Пригожин үшті-күйлі жоғалып кетті. Кремль қайда екенін білмейтінін айтты

МӘСКЕУ. 8 шілде. «Вагнер» ЖӘК құрылтайшысы Евгений Пригожинен екі күннен бері сыбыс жоқ. Кремльдің жазарманы Дмитрий Песков кеше оның қайда екенін білмейтінін мәлімдеді. Бұл туралы ТАСС ақпарына сілтеме жасаған rast.kz хабарлайды.

РФ президентінің баспасөз хатшысы жұма күні журналистерге Кремльдегілерде Пригожиннің қазір қайда жүргені жөнінде «ешқандай ақпар жоқ» екенін жеткізді.

«Мен ол жайында ештеңе айта алмаймын, бізде оның қайда жүргеніне қатысты ешбір мәлімет жоқ. Бұрынғы айтқандарыма басқа ештеңе қоса алмаймын», – деп атап өтті қызыл жұлдызды қыш ғимараттың өкілі.

Песков бұдан алдын Кремль Пригожиннің жүрген-тұрған жерлерін қадағалап отырмайды, оған ешқандай мүмкіндік жоқ дегенді жеткізіп еді.

Беларусь президенті Александр Лукашенко алдыңғы күні Пригожиннің белорус елінен шығып, Санкт-Петербургке қарай кеткенін,ал «Вагнер» жауынгерлерінің РФ территориясындағы өз лагерьлерінде қалғанын айтты.

«Менің естіп-білуімше, «Вагнер» ЖӘК жауынгерлері өз лагерьлерінде. Пригожинге келсек, ол қазір Питерде жүр. Ол Беларусь территориясында жоқ», – деді ол.

Еске сала кетейік, «Вагнер» жеке әскери компаниясының офисі Санкт-Петербургте орналасқан. Компанияның басшысы Пригожиннің отбасы да осы қалада тұрады.