Путин кеше түнде эфирге шығып, «Ресейдің тағдыры» жөнінде сөйледі

МӘСКЕУ. 27 маусым. Түнде РФ президенті Владимир Путин 5 минуттық үндеумен эфирден көрініп, «Ресейдің тағдырын анықтау» деген сияқты бірдеңелер төңірегінде көңірсітті. Бұл туралы ресейлік ресурстар дерегіне сүйенген rast.kz хабарлайды.

Үндеу Мәскеу уақытымен 19:30 шамасында оқылды.

Кремльдің баспасөз хатшысы Дмитрий Песковтың сөзіне қарағанда, Владимир Путин 5 минут қана сөйлеп, «Ресейдің тағдырын» анықтап берген.

Ресей диктаторы өзі билік тізгінін ұстағалы бергі уақыттар аралығында бірінші рет орын алып отырған ең ірі қарулы қарсылықтан кейінгі «тарихи» үндеуінде бұдан алдын көсілтіп келген мыжымалары болмаса, жаңадан жанынан шығарып, ештеңе айта қойған жоқ. Мұндағы жалғыз ғана жаңалық бүлікке қатысқан «вагнершілердің» Беларуське кету мүмкіндігін расқа шығару ғана болды. Оларға бұған альтернатива ретінде РФ қорғаныс министрлігімен шартқа отыру (Пригожиннің жан-тәнін салып қарсы шыққан нәрсесі) немесе қызметтен шығу ұсынылады.

Путин бұдан бөлек, «Вагнер» ЖӘК жалдамалыларының басым бөлігі патриоттар екенін атап өтті. «Олар арандатуға еріп қателесті, бірақ кешірім жасалды», – деді сосын.

Путин сондай-ақ бұрынғы сотталғандармен шайқаста ұшқыштардың қаза тапқандарын мойындады. «Бүлікті ұйымдастырушылар өз халқын сатып кетті» дегенді қосты соңынан.

Диктатор бұл жерде де Батыс пен Киевті ауызға алмай тұра алмады. Кремль қожайының ойынша, ресейлік әскерилердің бірін бірі атып өлтіріп жатқанына солар кінәлі екен.

Айтқандай, «дядя Вова» өзінің 5 минуттық сөзінде «дядя Женяның» атын бір рет те атамай кетті. Шамасы, бұл оның Пригожинге қатты өкпелеп қалған түрі болса керек.

Еске сала кетейік, прокси-бүлік 23 маусым күні кешке басталды. Ол «вагнершілердің» далалық лагерьлерін РФ армиясының Шойгу мен Герасимовтың бұйрықтары бойынша (екеуінің бұл турасында ымыраласып жатқаны жазылған аудиожазба тарады) атқылауынан кейін көтерілді. Алайда Путин тек 24 маусым күні ғана көпшілік алдынан көрінді. Осыдан кейін кешке қарай Пригожин Мәскеуге жорықтың тоқтатылғанын жария етті.

Кремльге жақын адамдар ресейлік элитаның өз президентттерінен әбден түңіліп, түбегейлі көңілдері қалғанын айтып отыр.

Батыс баспасөзі сонымен бірге Пригожиннің Путин беделін «нөлге» айналдырып, РФ армиясының мүлде дәрменсіз екенін көрсетіп кеткенін жарыса жазып жатыр.