Украина әскерлері РФ-ның Путин келген штабының күлін көкке ұшырды
КИЕВ. 9 маусым. Украина Қарулы күштері Ресейдің Херсон облысына қарасты Геническ ауданы аумағындағы бұрын Путин келіп кеткен «Днепр» әскери тобы базасын талқандады. Бұл туралы «Диалог. Ua» ақпарына сүйенген rast.kz хабарлайды.
Бүгін, 9 мамыр күні бұқаралық ақпарат құралдарында Украина Қарулы күштері Ресейдің Геническ пен Қырым түбегі аралығындағы Арабат шығанағында орналасқан әскери базасына соққы бергені жайлы ақпарат тарады. Онда РФ-ның «Днепр» әскерлер тобының штабы бар еді.
Ресей пропагандистері украин әскерлерінің оккупанттар ұясын британдық Storm Shadow ракеталарымен атқылағанын жазып жатыр. Бірақ олар басқыншылардың адам саны мен техника бірлігі жағынан қаншалықты шығынға ұшырағаны жайында ләм-мим демейді. Насихатшылар хабарларына қарағанда, бұл нүкте майдан шебінен 130 шақырым жерде тұрған сияқты.
Херсондық Special Kherson Cat атты Twitter пайдаланушы жарылыстың Счастливцево селосы маңында болғанын атап көрсетті.
Тап осы жерде бұрын «Бригантина» атты балалар лагері болған еді. Сәуір айында Владимир Путин осы жерге жасырын келіп қайтқан болатын. Алайда тиранның мұнда болғанын ВВС журналистері біліп қойып, жарияға жар салып жіберді.
Британия барлау қызметі «Днепр» әскерлер тобы майданның оккупанттар мейлінше көбірек шығынға ұшырап жатқан оңтүстік-батыс бөлігін қорғау үшін құрылғанын жазды.
Херсонның оккупациялық әкімшілігінің басшысы Владимир Сальдо базаға екі ракетаның туралап келгенін растайды және олардың бірін әуе қорғанысы күштері атып түсіргенін айтады.
Мұның алдында РФ Қарулы күштері ротасы жауынгерлерінің украин артиллериялары соққыларынан жаппай қашып бара жатқандары түсірілген видео да тарап еді.
Тап осы тұста Қырымның оккупациялық билігі тұрғындар мен сыртқа тасып алып кетуге тұратын материалдық-мәдени құндылықтардың тізімін жасап жатқаны белгілі болды.
