USD
КИЕВ. 4 маусым. Украина Қарулы күштері барлық бағыттарда Ресей оккупанттары позицияларына жаппай қарсы шабуылды бастап кетті. Бұл туралы ресейлік және украин пабликтеріне сілтеме жасаған rast.kz хабарлайды.
Алдын ала мәлімет бойынша, Украина қорғаныс күштері Донбастың Авдеевка бағытында соққы жасауға шыққан.
Ресей пропагандасының Z-каналдары украин армиясының барлық бағыттарда шабуылды өрістетіп келе жатқандарын жазуда. Ресей чекисі, соғыс қылмыскері, Нидерланд соты арқылы сырттай сотталушы Игорь Гиркин (Стрелков) өзінің Telegram-ында: «Қарсыластардың Донецк түбіндегі Авдеевка бағытында күшті шабуылға шыққандары жайлы айтылып жатыр. Жау тағы да Водяноены қайтарып алуға ұмтылып, селоға басып кірді. Қазір сол маңда ауыр ұрыс қимылдары жүріп жатыр», – деп атап көрсетті.
Украин тарапынан әзір мұны растау бола қойған жоқ. Алайда майдандағы жағдайдың ушығып, ширыға бастағаны хақында келіп жатқан мәліметтер көп. Мәселен, Украина Қарулы күштерінің Сватов, Бахмут, Запорожье бағыттарында алға жылжып келе жатқандары айтылуда. Осыдан Z-каналдарды үрей жайлап алған. Олар Украинаның үлкен қарсы шабуылы басталып кеткеніне сенімді болып отыр.
Осымен бір мезгілде Ресейдің Белгород облысының жерінде ресейлік еріктілердің «Свобода России» легионы «Орыс ерікті корпусымен» бірге ұрыс қимылдарын жалғастырды. Қазір облыс территориясында екі жақтың қиян-кескі соғысы жүріп жатыр. Кремль мұнда көмекке өзінің ең соңғы резервін жіберуге мәжбүр болды.
Ресей еріктілері бүгін Белгород облысының губернаторы Вячеслав Гладковты өздерімен келіссөз жүргізуге шақырды. Губернатор өз кезегінде оларды «сұмырай, оңбаған, фашист» деп алып, өздерімен ұшырасуға келісім беріпті. Келіссөз Шебекино селосында өтуге тиіс.
Бұдан бұрын «Диалог.UA» Қорғаныс күштерінің Сватов және Бахмут түбінде майдан шептерін жарып өткендерін хабарлады.
Мұның алдында «Вагнердің» құрылтайшысы Евгений Пригожин Бахмуттың бір бөлігін ресейліктердің уыстарынан шығарып алғандарын, украин әскерлерінің Угледар түбіндегі шепті жарып өткендерін мойындаған болатын.
Өткен түнде Қырымға 5 ұшқышсыз ұшақ шабуыл жасады. Сондай шабуыл осы күнгі Ресейдің бес өңіріне жасалды.
Бүгінде РФ-ның Украина шекарасына жақын барлық аймақтарын үрей жайлап алған.
Бұрнағы күні Украина президенті Володимир Зеленьский Украина Қарулы күштерінің үлкен қарсы шабуылға шығуға толық дайын екенін мәлімдеген еді.
Содан алдын АҚШ генералы, ЦРУ-дың бұрынғы басшысы Дэвид Петреус украиндардың қарсы шабуылдары өте күшті болатынына сенім білдірді.
