USD
ТАШКЕНТ. 25 наурыз. Кеше футболдан Өзбекстан терме жамағаты Боливия құрамасымен жолдастық кездесу өткізіп, 1:0 есебімен жеңіске жетті. Бұл туралы өзбек сайттарына сілтеме жасаған rast.kz хабарлайды.
Словен маманы Сречко Катанец жаттықтыратын Өзбекстан ұлттық құрама командасы Оңтүстік Америка құрлығының өкілімен осы жолы бірінші рет күш сынасып көрді.
«Futbolium» тelegram-каналы атап көрсеткендей, бұл шайқас «Ақ қасқырлардың» Латын Америкасы елдері құрамасымен өткізілген ең алғашқы ұшырасуы болды. Онда алаң иелері кездесу тағдырын шешті. Голды 36-минутта команда капитаны Эльдар Шомуродов салды.
Матчтың 36 пайызында допқа алаң иелері, 56 пайызында меймандар иелік етті. Өзбектер қақпаға қарай 3 соққы берсе, боливиялықтар 7 рет ұрды, соның ішінде алаң иелері 2 мәрте, қонақтар 3 дүркін оны дарбазаға тура бағыттады.
Айта кетейік, бұдан біршама уақыт бұрын Өзбекстан құрамасы Ташкентте Қазақстанмен жолдастық кездесу өткізіп, 2:0 есебімен жеңіске жеткен болатын.
Енді Өзбекстан терма жамоаты 28 наурыз күні Венесуэла құрама командасымен өз алаңында тағы бір жолдастық кездесу өткізеді.
Еске сала кетейік, венесуэлалықтар кеше Эр-Риядта жергілікті Сауд Арабиясы құрамасымен кездесіп, алаң иелерін 2:1 есебімен жеңді.
Тағы бір айтатын жайт, биылғы 19 наурыз күні Өзбекстан жастар құрамасы (U20) Азия чемпионатының финалында Ирак командасын 1:0 етіп ұтып, құрлық чемпионы атанған болатын. Мұның өзі өзбек футболының зор болашағы бар екенін байқатады.
