Зеленьский Бахмут жағдайына байланысты әскери басшыларды жинады
КИЕВ. 15 наурыз. Украина президенті Володимир Зеленьский майдандағы қазіргі жағдайға байланысты шешім қабылдау үшін ставканың кезекті отырысын өткізді. Бұл туралы «Диалог.ua» сайтына сілтеме жасаған rast.kz хабарлайды.
Негізгі әңгіме соңғы біраз уақыттан бері екі жақ үшін де «маңдай соғылар тасқа» айналып тұрған Бахмут қаласындағы ұрыс қимылдары мен оның келешегі төңірегінде өрбіді.
«Сейсенбі, 14 наурыз күні Жоғарғы бас қолбасшы – президент Володимир Зеленьский ставканың кезекті отырысын өткізді», – делінген хабарламада.
Мемлекет басшысы елдің әскери басшылығымен бірге Бахмуттың мәселесін талқылады. Мұның бүге-шігесі Украина президенті офисінің ресми сайтында жарияланды.
Жиында РФ-ның басқыншы армиясы қоршауға алуға талпынып жатқан Бахмут қаласының қорғанысы жайында айтылып, оны қорғау мен тастап шығу мәселесі кеңінен талқылады. Нәтижесінде қаланы ұстап тұра беру жөнінде шешім қабылданды.
«Ставканың барлық мүшелері Бахмутты ұстап тұруды және қорғауды одан әрі жалғастыру хақында ортақ позицияс білдірді», – деді президент офисіндегілер.
Елдің әскери басшылығы сондай-ақ майданның алдыңғы шебіндегі қорғаныс күштерін қажетті қару-жарақпен және оқ дәрілермен қамтамасыз ету мәселесін де талқылады. Барлық жоспарларға келісім алынды.
Отырысқа Зеленьскийдің өзінен басқа, Украина Қарулы күштерінің бас қолбасшысы Валерий Залужный, барлау бастығы Кирилл Буданов, қауіпсіздік кеңесінің хатшысы Олексий Данилов, президент офисі басшысы Ондрий Ермак, үкімет басшысы Денис Шмыгаль және басқалар қатысты.
Айта кету керек, қазір Бахмуттағы жағдай шынында өте ауыр. Бірқатар сарапшылар Украина қорғаныс күштерінің қаладан кетуге асыға қоймайтын себебі – мұнда өтетін ұрыс қимылдары РФ оккупациялық күштерін «алдап түсіріп», қуатын азайта беруге қолайлы дегенді алға тартады.
Оккупанттар Бахмут үшін шайқастарда украиндарға қарағанда, бес есе көп адам шығынына ұшырады. Қираған техникаларда есеп жоқ.
Ескерту!
rast.kz сайтының кез келген материалын редакцияның арнайы рұқсатынсыз көшіріп алып жариялауға тыйым салынады. Плагиат жасаушы «Авторлық құқық туралы» Заңға сәйкес қудаланады.
