USD
СОФИЯ. 24 ақпан. Софияда өтіп жатқан «Странджа Кубогы-2023» халықаралық турнирінің кешегі шайқастарында біздің 2 боксшы жеңіп, 6 спортшы жарыс жолынан шығып қалды. Бұл туралы Sports.kz хабарлады.
«Қазақстанның ерлер құрамасы Софияда (Болгария) өтіп жатқан «әлемнің кіші чемпионаты» атағы бар «Странджа» халықаралық турнирінде тоғызыншы боксшысын үміткерлер сапынан жоғалтты», – деп хабарлады сайт.
Күндізгі сессияны бізден 51 килоға дейінгі салмақтағы Кенже Мұратұлы ашты. Бірақ турнирге келгелі бірінші рет рингке көтеріліп тұрған өзі қарсыласынан жеңіліп тынды. Төрешілер жеңісті бір ауыздан үнділік Бишмавитре Чонхгамға берді. Ал біздің белді боксшыларымыздың бірі – Абзал Құттыбеков (92 кг) грузиялық Артем Иорданянмен ұрысында рефери тарапынан үш рет ескерту алып, дисквалификацияға ұшырады.
Кешкі сессияда 48 килоға дейінгі салмақтағы Ернұр Қайрат грузин Лука Кублашивилиден ұпай бөлісімен жеңіліс тапты. Бұдан әрі 67 килоға дейінгі салмақтағы Темірхан Тезек өзбек Бекзод Хамидовке тап солай жол берді. Ал 86 килоға дейінгі салмақтағы Бекзат Таңатар кезекті «эль-классикода», яғни «өзбек-қазақ дербиінде» Шохжахон Абдуллаевтан осалдық танытты.
Ең соңында аса ауыр салмақтағы Қамшыбек Қоңқабаев ежелгі қарсыласы, өзбек Баходир Жалоловпен шайқас алдында белгісіз себептермен сайыстан шығып қалды.
Бұл күні Қазақстан құрамасы сапынан тек Оразбек Асылқұлов (57 кг) пен Бекзад Нұрдәулетов (80 кг) қана жеңіс тойын тойлады. Бұлардың біріншісі бразилиялық Луис Оливейраны төрешілердің бір ауызды шешімімен ұтып шықса, екіншісі сербиялық Артем Агеевті дәл солай тізе бүктірді.
Бұған қосарымыз, 2019 жылы әлем чемпионатының «алтынын» жеңіп алған Бекзад Нұрдәулетов кейін кәсіпқойлар лагеріне ауысып кеткен еді. Онда 6 рет рингке шығып, бәрінде де жеңіске жеткен, 2 дүркін қарсыластарын нокаутпен ұтқан саңлақ жақында әуесқойлар сапына қайта оралды. Ал оның бүгінгі бәсекелесі – негізі ресейлік, Мәскеу түбіндегі Серпухов қаласында туып өскен Агеев өткен жылы мамыр айында Ереванда өткен құрлық чемпионатында Сербияға Еуропаның «алтынын» алып берген болатын.
Бұларға тағы бір қосарымыз: Қазақстан құрамасының бас жаттықтырушысы Мырзағали Айтжанов бұл турнирге тәжірибе жината беру мақсатымен негізінен терме жамағатымыздың үшін-төртінші лектегі былғары қолғап шеберлерін алып барды. Шынын айтқанда, мына құрамдағы жігіттердің біразының аты-жөндеріне қалың жанкүйер қауымның басым бөлігі әлі жете таныс емес. Бұл ретте біз құрама сапынан Нұрқанат Райыс пен Қамшыбек Қоңқабаевтан басқа «бірінші нөмірлі» боксшыны көріп тұрған жоқпыз. Жоғарыда айтылған Бекзад Нұрдәулетов те кәсіпқойлар қатарына кеткеннен кейін бұл мезіреттен айырылып қалған, енді сол орынды қайтып алуы үшін оған әлі біраз тер төгуге тура келеді. Ал көп жылдардан бері Қазақстан чемпионатында кіл «медальдылар ауылынан» көрініп келе жатқан Абзал Құттыбеков командадағы екінші-үшінші лектегі мүшесі болып саналады.
Сонымен, турнирде – ертең жартылай финал. Жексенбі күні жарыс өз мәресіне жетеді.
