Иранда жанкүйерлер «Зенитпен» ойын кезінде Украинаға қолдау көрсетті
ТЕГЕРАН. 18 ақпан. Иранда Петербургтің «Зенит» футбол командасының ойыны кезінде жергілікті жанкүйерлер Украинаны қолдайтын перфоманс ұйымдастырды. Бұл туралы «Украина 365» телеграм-каналы хабарлады.
«Иран жанкүйерлері өз командалары Петербургтің «Зенитімен» өткізген жолдастық кездесуі барысында Украинаны қолдайтын әрекеттер көрсетті», – делінген хабарламада.
Бұл күні Нева жағалауынан келген клуб Тегеранның «Сепахан» командасымен күш сынасты. Екі команда да өз чемпионаттарында қазір көш бастап келеді.
Жалпы, Ресейдің Украинаға ашқан басқыншылық соғысына байланысты оқшаулауға түсіп қалған ресейлік футбол клубтары енді жалғасқалы тұрған чемпионаттарына дайындық шеңберінде әртүрлі «экзотикалық» жерлер тауып алуға мәжбүр болып жүр. Олармен көптеген елдердің командалары байланысқылары келмейтіні белгілі.
Кеше, 17 ақпан күні «Зенит» Тегеранда жергілікті «Сепаханмен» жолдастық кездесу өткізді. Алайда, Ресей Федерациясының қазіргі әрекеттеріне наразылар парсы елінде де аз емес екен.
Иран футбол фанаттары, өз елдері үкіметінің Мәскеумен достық қарым-қатынасты үзбей жалғастырып келе жатқанына қарамастан, Украинаны қолдайтындарын матч басталғаннан анық байқатты. Олар ойын кезінде трибуналарға Украина жалауларын жайып ұстап тұрды. Бұған қоса, өз елін басқыншы жаудан қорғап жатқан украиндарды қолдайтын ұрандар айтты.
Матч барысында «Сепахан» командасының футболшылары да қонақтарға жылы шырай таныта қоймады. Олар әр таймда петербургтіктер дарбазасына бір доптан салып, қорытындыда 2:0 есебімен жеңіске жетті.
Тағы бір айта кететін жайт, «Зенит» құрамындағы қазақстандық футболшы Нұралы Әліп кездесудің екінші таймында алаңға шықты.
