USD
МӘСКЕУ. 3 қаңтар. Ресейдің бір топ «солдат жесірлері» президент Путинге үндеу арнап, «жаудан кек қайтару» үшін жалпыға бірдей мобилизация жасауға шақырды. Бұл туралы The Moscow News хабарлады.
«Ресейде жалпыға бірдей мобилизация жариялап, шақырылым жасындағы ер кісілердің елден тысқары кетулеріне жол бермеу қажет». «Солдаттар жесірлері» РФ президенті Владимир Путинге арнаған үндеуінде осындай тілек білдірген.
«Біз өз президентіміз Владимир Владимирович Путинге қазір еліміздің шекарасында қалыптасып қалған ахуалға сәйкес Ресей армиясына кең ауқымды мобилизация жариялауға рұқсат етуді сұраймыз», – делінген «жесірлер» үндеуінде.
Мәтін авторлары сондай-ақ «шақырылым жасындағы ер кісілердің елден тысқары кетулеріне жол бермеу қажеттігін» ұсынады. «Күйеулеріміз осы ер кісілерді қорғай жүріп қаза тапқандықтан, біздің бұлай деуге толық хақымыз бар деп есептейміз, әйтпесе енді бұлар болмаса, бізді кімдер келіп қорғайды?», – деп күңіренеді қатындар сосын тағы.
«Жесірлердің» айтуларынша, бүгінде Ресейді шақырылым жасындағы «ондаған миллион» ер кісі бар. «Олар қазір үйде отырып не істейді, білгір комадованиясыз, жабдықтау мен жарақтандырусыз не істей алады? Мобилизация – олардың өздерін өздері қорғап қалуларының бірден-бір жолы», – делінген мәтінде.
«Қаралы қатындар» сосын Путинге мобилизация мәселесіне келгенде, «әлдеқандай бір рейтингілер мен «бөтен ойлылардың» наразылықтарын» жайлы ойланып жатпай, «тек жеңіске жетуді» ғана көздеген Иосиф Сталинмен теңесуді ұсынады. Үндеудің соңында авторлар «бұл – біздің өтінішіміз, біздің шешіміміз, біздің талабымыз» деп атап көрсетеді. «Біз биліктің бұл даусымызды естімейтініне сенбейміз», – деп хатты түйіндейді «жесірлер».
«Солдаттар жесірлері» өз телеграмм-каналдарында өздерін «әрбір жесірдің жобасымыз», сондай-ақ «елдің тірегіміз» деп атайды. «Біз – өзінің күйеуін қорқақтанып балалары мен юбканың артына жасырып қоятындар сұрпынан емеспіз. Біз – қаза тапқан күйеулерін шексіз мақтан тұтатындар тұрқынанбыз», – деп «ағынан ақтарылады» жобаның авторлары.
