USD
УАШИНГТОН. 5 шілде. АҚШ президентінің сүйікті газеті – New York Post Дональд Трампты Ресейді «өліп бара жатқан лаңкестік дәулет» деп атап, оны Украинаға көмектесуге шақырды. Бұл туралы Dialog.ua ақпарына сүйенген rast.kz хабарлайды.
New York Post журналистерінің пайымынша, егер бұл соғыста Ресей жеңер болса, ол тек Мәскеу – Бейжің белтемірін нығайта түседі. Мұның өзі және АҚШ-тың халықаралық деңгейдегі беделіне қатты нұқсан келтіреді. Мәтбұғат сонымен бірге Уашингтонның одақтастарына деген сенімін әлсіретеді деп атап көрсетеді.
Белгілі болғанындай, Дональд Трамп сүйсініп оқитын АҚШ-тың ең ықпалды және консервативті газеттерінің бірі – New York Post Ақ үйдің иесіне ашық үндеу жолдаған.
Басылым өзінің редакциялық бағанында жарияланған мақалада мемлекет басшысын Украинаны қолдаудан бас тартпауға шақырып, Ресей диктаторы Владимир Путиннің тек күшті мойындайтынын атап өтеді.
Журналистер президентке соғыстың созылуына Ресейдің агрессиялық саясаттан қайтпауы ғана нақты себеп болып қала беретінін еске салды. Сондықтан енді оның алдына түсіп, сипақтай берудің еш қажеті жоқ, оған тегеурінді қарсылық пен өзгеше өктемдік, батыл шешім мен қауқарлы қимыл ғана керек.
Үндеу авторлары президент Трамптың Нидерландта көзіне жас алып тұрып, өз отбасы үшін қауіп қылатынын айтып берген украин журналисімен жүрек тебірентерлік әңгімесін еске сала отырып, Уашингтон неге оны мен басқа украин азаматтарын тағдырдың тәлкегіне тастап кеткісі келетінін білгілері келетіндерін алға тартады.
«Ресей – экономикасы қарқынды дамыған аса қуатты держава емес. Ол – өліп бара жатқан террорлық мемлекет», – делінген хабарламада.
Басылым сондай-ақ «Украинаға көмек көрсету АҚШ-тың мүдделеріне нұқсан келтіреді» деп мәлімдеген қарсыластардың уәждерін де сынға алды. Керісінше, Киевке әскери көмек көрсету Құрама Штаттардың қорғаныс өнеркәсібін дамытуға тікелей ықпал етеді, ал Украина өзіне жеткізілген қару-жарақтардың бір бөлігінің ақшасын Ресейдің қатырып тасталған активтері мен еуропалық гранттар есебінен төлейді.
Сарапшылар соғыстың нәтижесі жаһандық зор мәнге ие екенін атап көрсетеді. Егер бұл соғыста Ресей жеңіске жетсе, ол Мәскеу – Бейжің белдеуін күрт күшейтіп жіберіп, АҚШ-тың халықаралық одақтастарына деген сенімін әлсіретеді. Сондықтан Украинаға көмектесу арқылы Уашингтон Ресейді ғана емес, Қытайды да тырп еткізбей уысында ұстай алады.
Үндеуде президенттің басқа салалардағы табыстары да еске алынды. Соның ретінде кейін қабылданған заңдар, Жоғарғы сотта жеңіп алынған істер және Иранды тежеу үшін шешуші қадамдар атап өтілді. Авторлар дәл осындай стратегияны Ресейге де батыл қолдануға шақырды, өйткені Кремль тек күшті ғана түсінеді, мықтыны ғана мойындайды, әлеуеттіден ғана қорқады.
Қорытындылай келе, редакторлар Трамптың бұдан бір күн бұрын Зеленськиймен Украинаның әуе қорғанысын нығайту мәселесін талқылаған әңгімесіне оң баға бере отырып, Сопақша кеңсе басшысын тағы да Украинаны барын салып қорғауға шақырды.
Бұған дейін мәлім болғанындай, Дональд Трамп осының алдында Украинаға Patriot керек екеніне келісіп, оған осындай жүйелерді тағы да жеткізуге рұқсат ектен еді.
Бұған қоса, АҚШ президенті Ресейге қарсы жаңа санкциялар енгізудің мүмкіндігі бар екенін баяндап, мұның себептері де жеткілікті екенін айтты.
