Иран құрамасы наразылық ретінде өз елдері гимнін шырқаған жоқ
ДОХА. 22 қараша. Катарда өтіп жатқан футболдан әлем чемпионатына қатысушы Иран құрамасының ойыншылары Англиямен кездесу алдында өз Үкіметтеріне наразылық ретінде ел гимнін айтпай қойды. Бұл туралы «Азаттық» радиосы хабарлады.
«Футболдан Иран құрамасының ойыншылары Катарда өтіп жатқан әлем чемпионатында 21 қараша күні Англиямен ойналған бірінші сөрелік матчында өз елдерінің гимнін шырқамады», – делінген хабарламада.
Матчтың алдында ирандықтардың Нидерландтың «Фейеноорд» клубында ойнайтын капитаны Алиреза Жаганбахш осы күндері Иранда болып жатқан үкіметке қарсы наразылық қозғалысына қолдау көрсету ниетімен команданың осындай «ұжымдық» шешімге келгенін айтты.
Кездесу басталар алдында Иранның гимні ойналып жатқанда ел құрамасының 11 ойыншысы ауыздарына су құйып алғандай үнсіз, оның үстіне, қабақтары қатулы болып тұрды.
Бұған дейін Иранның баскетболдан құрама командасының мүшелері де халықаралық матчта солай еткен еді.
Еске сала кетейік, біршама уақыттан бері Иранда билікке қарсы наразылық қозғалыстары жүріп жатыр. Ол қыркүйек айында парсы елі полициясының 22 жастағы Махса Аминиді хиджаб кимей жүргені үшін азаптап өлтіргенінен кейін басталып кетті. Бұл бүкіл елде бір мезгілде қарсылық қозғалысының бұрқ ете қалуына апарып соқтырды.
Қозғалысқа Иранның жекелеген футболшылары да қолдау білдірді.
