Жаңалықтар жаңғырығыҚайнар

Еуропарламент РФ-ны лаңкестікті демеуші ел деп танығалы жатыр

СТРАСБУРГ. 18 қараша. Еуропарламент Ресей Федерациясын терроризмге демеуші ел деп тану жөніндегі қарар мәтінін мақұлдады. Бұл туралы УНИАН хабарлады.

Еуропа парламентінің саяси топтары Ресей Федерациясын терроризмге дем беріп, оны қолдап отыратын ел деп жариялау жөніндегі қарар жобасының мәтінін талқылап, ортақ ұйғарымға келді.

«Еуропарламенттегі саяси топтар арасындағы төрт сағаттық келіссөзден кейін мәтін бойынша келісімге қол жеткізілді», – деп баяндады Еуропа парламентінің мүшесі Андрюс Кубилас Twitter-дегі микроблогында.

Кубилас соның ішінде қарар жобасының басты тармағы былай өрілетінін атап көрсетті: «Еуропа парламенті… Ресейді терроризмге демеушілік көрсететін мемлекет және террорлық құралдарды өзі де қолданатын мемлекет деп таниды».

Еуропарламент сайтында келесі отырыстың Страсбургте 21-24 қараша күндері өтетіні құлақтандырылған.

13 қазанда Еуропа Кеңесінің Парламенттік ассамблеясы «Ресей Федерациясының Украинаға қарсы агрессияны одан әрі ұшықтыруы» деп аталатын қарар қабылдап, онда Ресей режимінің террорлық сипатта екенін алғаш рет айқындап алған еді.

18 қазанда Эстония парламенті Ресей Федерациясының билік басындағы режимін террорлық деп таныды.

26 қазанда Польша Сенаты Ресей Федерациясының билігін террорлық режим деп тану жөнінде шешім қабылдады.

Бұдан кейін Чехия депутаттары Ресейдің қазіргі режимін террорлық деп мойындауға ұйғарым жасады.

Бұлардың бәрінен алдын Латвия және Литва мемлекеттерінің парламенттері Мәскеу билігінің террорлық сипатта екенін жалпақ жаһанға жария еткен болатын.

Ал жақында ғана Украина президенті Володимир Зеленский әлем елдерін Ресейді террорды демеуші дәулет деп тануға шақырды.

Тағы көрсету

Пікір қалдыру

Ұқсас мақалалар

Back to top button