Жолаушы пойызында темекі шегуге тыйым салынды

Павлодар, 20 тамыз. Қазақстанда жолаушылар тасымалдайтын пойыздарда темекі шегуге тыйым салынды. Бұл туралы nur.kz хабарлады.
«Павлодар» станциясындағы желілік полицияда айтылғандай, жаңалық бүгінгі күннен басталған.
Полицейлердің айтуларынша, бұрын пойызда шылым шегуге қатысты қатаң тыйым болмаған. Қазір жолаушылар пойызының қоғамдық орынға жататыны ескеріліп, бұл жөніндегі ережеге тиісті өзгеріс енгізілген.
«Жолаушылар пойыздарында темекі шегуге тыйым салынды, оған тек пойыз тоқтаған стансаларда ғана рұқсат етіледі. Вагонның тамбуры ма, басқа жер ме, бәрібір – темекі шегуге болмайды. Есесіне, біз 441-бапқа сәйкес оларды әкімгершілік жауапкершілікке тарта аламыз. Айып пұл көлемі 3 ең төменгі жалақы мөлшерін құрайды», – деп мәлімдеді «Павлодар» стансасы желі полициясы әкімшілік полициясы бөлімінің бастығы Архат Күленов.
Полицейлердің ақпарларына сәйкес, әдепкі кезде олар жолаушылар тарапына ескертулер жасаумен шектеледі, сосын белгілі бір уақыт өткеннен кейін айыппұл жазуға көшеді.
Полициядағылар бұған дейін вагондарда спиртті ішімдіктер ішуге тыйым салынғанын еске түсірді. Бұл ереже бұдан бұрын жүзеге асырыла бастаған.