Украин әскерлері Мариупольде соғысып жатқан қаруластарын құтқарды
КИЕВ. 20 сәуір. Украинаның 36-шы теңіз жаяу әскерлері жеке бригадасының жауынгерлері басқа бөлімшелермен бірге Мариупольде қоршауда қалған қаруластарын құтқарып қалды. Бұл туралы Obozrevatel хабарлады.
Порт сарбаздарына Украина Қарулы күштерінің басқа бөлімшелері мен Ұлттық гвардия жауынгерлері көмекке келіп, Мариупольдегі қаруластарын құтқару жөніндегі операцияны сәтті өткерді. Олар өз бастарын бәйгеге тіге жүріп, порттан мың жарым шекарашы мен «Азовсталь» зауыты территориясындағы полиция қызметкерлерін құтқарды.
Операция барысында Мариуполь қорғаушылары Ресей оккупанттарына күйрете соққы берді.
Басылым мәліметінше, Николаевтен келген теңіз жаяу әскерлері «азовшылармен» бірге Мариуполь теңіз порты территориясына бұзып-жарып кіріп, ондағы украин шекарашылары мен ұлттық полицияның бірнеше бөлімшесіне көмекке келді. Бұл кезде олардың оқ-дәрілері таусылуға жақындап қалған екен. Егер сырттан қорғаушылар келмегенде, порттағы 500-ге жуық украин жауынгері қаза тапқан не тұтқынға түскен болар еді.
Соңынан қоршаудағы қаруластарын құтқаруға келген «Азов» бригадасы мен Украина Қарулы күштері әскерлері жауға оқ жаудыра отырып, жолдастарын сыртқа алып шықты.
Бұдан шамалы ғана уақыт бұрын 36-шы теңіз жаяу әскерлерінің командирі Сергей Волына әлемге жар салып, өздерін РФ басқыншыларының қоршауынан алып шығуға көмектесуді сұраған болатын. Олар мұнда жаумен ұрыс басталған күннен бері соғысып жатқан еді.
