USD
АСТАНА. 17 қаңтар. Қазақстанның бұрынғы президенті Нұрсұлтан Назарбаевтың ортаншы күйеу баласы Тимур Құлыбаев «Атамекен» ұлттық кәсіпкерлер палатасының бастығы қызметінен алынды. Бұл туралы ҚазТАГ хабарлады.
Құлыбаев бұл қызметтен кетуге өз еркімен арыз жазып берді.
Бірақ әзірге оның Қазақстан Ұлттық Олимпиялық комитетінің төрағасы қызметінде қала беретіні айтылған.
Тимур Асқарұлы Құлыбаев 1966 жылы Алматы қаласында туған. Дулат тайпасының сиқым руынан шыққан. Әкесі Асқар Құлыбаев кезінде партия-кеңес қызметінде болып, бірінші хатшы ретінде Гурьев облысын басқарған.
Тимур Құлыбаев – Назарбаевтың ортаншы қызы Динара Құлыбаеваның күйеуі. Екеуі үш бала тәрбиелеген. Ол осы кезге дейін елде өзі үшін мүмкін болған барлық «майлы» қызмет орындарының бәрін басқарып шықты. Ал «Атамекен» ұлттық кәсіпкерлер палатасының тізгінін 2013 жылдан ұстап келді.
«Форбстың» мәліметі бойынша, Тимур әйелі Динара екеуі Қазақстандағы ең бай олигархтардың бірінен саналады. Қазір бұлардың әрбірінің жеке есепшоттарында 3.5 миллиард долларға жуық қаржы бар.
Құлыбаевтың өмірінің екінші жағы – оның бүгінде Ұлыбританияда тұрып жатқан 1980 жылы Жамбыл қаласында туған, қазір «Гоги Ашкенази» атанып жүрген Гауһар Еркінқызы Берқалиевамен көңілдестік қарым-қатынасы. Бұл туралы ештеңе де айтпасқа болар еді, егер бұл арыстан жалды әйел осы ашыналықтың арқасында Қазақстанның есепсіз байлығының бір пұшпағына ие болып отырмаса. Оның бүгіндегі байлығында да есеп жоқ.
Еске сала кетейік, 15 қаңтар күні Назарбаевтың бұдан басқа екі күйеу баласы өте «майлы» қызметтерін тоқтатуға мәжбүр болған еді. Атап айтқанда, Дариға Назарбаевтың азаматтық күйеуі Қайрат Шәріпбаев «ҚазТрансГаз» Ұлттық компаниясы» АҚ басқарма төрағалығынан, Әлия Назарбаеваның күйеуі Димаш Досанов «ҚазТрансОйл» АҚ басқарма төрағалығынан кетті.
