USD
ВАШИНГТОН. 8 желтоқсан. АҚШ-та тұратын қазақ қызы Сәуле Омарова осы елдің Қаржы министрлігі валютаны бақылау басқармасының басшысы лауазымынан алдын ала бас тартты. Бұл туралы ТАСС хабарлады.
Агенттіктің хабарлауынша, Сәуле Омарова осыған байланысты өтініш жазып берген. Оны президент Джо Байден қанағаттандырған. Оқиға кеше болған.
Кезінде Байден қазақ қызына АҚШ Қаржы министрлігі валюта бақылау басқармасын басқаруды ұсынған болатын. Қараша айының басында оның кандидатурасы АҚШ Конгресінде қаралды. Республикалықтар оны тыңдау кезінде біраз жөнсіз шабуылдар жасады. Оған тіпті кезінде комсомолда болғаны да мін болып тағылды.
Сәуле Омарова 1966 жылы Орал қаласында туған. МГУ-ді бітірген. Оқу бітіргеннен кейін университетте қалдырылған. 1991 жылы ол бағдарлама алмасу мақсатында АҚШ-тың Вискон университетіне барады. Ал КСРО тарағаннан кейін АҚШ-та қалып қояды.
Бұған дейін АҚШ-тың 43-ші президенті кіші Джордж Буштың кеңесшісі болған екен.
Сәуле Омарова өзінің мұндай қадамға баруы жеке жұмыстарына байланысты шыққанын айтты.
Бір айта кететін жайт, Сәуленің бұл қызметтен бас тартып жатқаны туралы хабарлаған Ресей бұқаралық ақпарат құралдарының бірде-бірі оның Қазақстанда туған қазақ қызы екені жөнінде ләм-мим деп ауыз ашқан жоқ. Олардың бәрі «Уроженка СССР Омарова не будет выдвигать свою кандидатуру на пост в Минфине США» деп жазып жатыр.
Осыдан өздеріңіз-ақ қорытынды шығарып алыңыздар. Кімнің кім екені осындайда білініп қалады. Іштарлық деген кесел біздің солтүстіктегі көршілеріміздің қандарына біткен қасиет еді, сонысы қазір сәт сайын атойлап шығып қалып жүр.
Айтқандай, Сәуле деген есім түркі халықтарында қазақтан басқа ешкімде жоқ. Оны басқамен шатыстырып алу мүмкін емес. Болса да, тек өзімізге тілдері барынша жақын, кезінде бір Ноғай Ордасының құрамында бірге болған қарақалпақ пен ноғайда ғана аздап кездесіп қалуы мүмкін.
