USD
БЕЛГРАД. 26 қазан. Кеше Сербияның астанасы – Белград қаласында жалау көтерген әлемнің 21-ші чемпионатында қазақстандық екі боксшы жеңіске жетті. Бұл туралы rast.kz хабарлады.
Бұл күні 1/32 финалдық іріктеу айқастары басталды. Бізден алдымен 57 кг салмақтағы Серік Теміржанов (суретте) Азияның қазіргі чемпионы, моңғол Энкх-Амара Хархуумен қолғап түйістірді. Төрешілер жеңісті бір ауыздан біздің спортшыға берді – 5:0! Ол енді 1/16 финалда жапон Рейто Цуцумимен жұдырықтасады.
Біздің екінші боксшымыз – 67 кг салмақтағы Абылайхан Жүсіпов тайпейлік Лин Юмен ұшырасты. Мұнда да қазақстандықтың басымдығына ешкім шәк келтірмеді. Абылайхан келесі айналымда веенсуэлалық Кристиан Паласиомен күш сынасады.
Бүгін тағы екі боксшымыз шаршы алаңға шығады. Атап айтқанда, Токио Олимпиадасының қола жүлдегері 51 кг салмақтағы Сәкен Бибосынов Рио Олимпиадасының чемпионы, Вэл Баркер Кубогының иегері өзбек Хасанбой Дусматовпен бірге кімнің мықты екенін анықтаса, 75 кг салмақтағы дебютант Нұрқанат Райыс черногориялық Стефан Савковичпен шайқасады.
Қалған боксшыларымыз жөнінде. 48 кг салмақтағы Теміртас Жүсіпов екінші айналымда, 1/16 финалда іске қосылады. Ол Мұхаммед Үнлү (Түркия) / Омер Амитович (Сербия) арасындағы жеңімпазбен кездеседі. Қалай болғанда да, түрік оғланына тап келгелі тұр.
54 кг салмақтағы Махмуд Сабырхан Корея өкілімен беттеседі.
60 кг салмақтағы Саматәлі Төлтаев бірінші айналымдағы ұрысқа қатыспайды. Оның егіз сыңары Санатәлі Төлтаев 63,5 кг салмақта рингке шығып, молдован Чеботарумен айқасады.
71 кг салмақтағы Асланбек Шымбергенов бірінші шайқасын ирандық Моради Аташпен өткізеді. Одан өтсе, 1/16 финалда Рио Олимпиадасының финалына Данияр Елеусіновтен жеңілген өзбек Шахрам Гиясовпен ұшырасуы мүмкін.
80 кг салмақтағы Нұрбек Оралбай екінші айналымда шығып, бразилиялық Филмомен ұрыс салады. 86 кг салмақтағы Бек Нұрмағамбет те бразилиялық Мачадомен бірінші айналымда шайқасады. 92 кг салмақтағы Айбек Оралбай поляк Березницкимен қолғап түйістіреді. Ал аса ауыр салмақтағы Нұрлан Сапарбай 1/16 финалда испан Друсси Гадфамен тіреседі.
Бүгін «Қазспорт» телеарнасы 17:00-18:20 және 22:00-02:10 аралығында әлем чемпионатынан репортаж береді.
