Тәжікстан ұлты қырғыз кісілерді елден шығарып жатыр
БІШКЕК. 5 мамыр. Тәжікстан этникалық қырғыздарды ел территориясынан шығарып жіберіп жатыр. Бұл туралы K-News.kg хабарлады.
Қырғызстан сыртқы істер министрлігі осыған байланысты мәлімдеме жасады. Ведомство баспасөз қызметінің хабарлауынша, Тәжіктан территориясында тұрақты және уақытша тұрып жатқан ұлты қырғыз азаматтарды елден шығару фактісінің орын алып жатқаны рас.
Аталмыш оқиғалар қырғыз-тәжік қақтығысынан біраз бұрын басталып кеткен көрінеді.
«Аталған проблема Қырғызстан сыртқы істер министрлігінің ұдайы назарында тұр. Мұндай әрекеттер биылғы жылдың наурыз айының ортасында басталып кетті. Ол жайында алғашқы дабыл Лахш (бұрынғы – Жергетал) ауданынан түскен. Операцияны Тәжікстан паспорт-миграция қызметі жүргізген. Қырғыз тарапы бұл жайында 1 сәуір күні Мәскеуде Қырғызстан сыртқы істер министрі Р. Қазақбаевтың тәжікстандық әріптесі С. Мухриддинмен кездесуі кезінде айтылды», – делінген онда.
Сондай-ақ бұл әңгіменің жақында сыртқы істер министрлері деңгейінде өткен кездесуі кезінде тағы қозғалғанын айта кетуіміз керек.
