USD
ШЫМКЕНТ. 23 сәуір. Шымкентте жасырын ашылған дәмханаға барып тамақтанған полицей қызметінен босатылды. Бұл туралы «ҚазАқпарат» хабарлады.
Қалалық полиция департаментінің бастығы Ералы Жұмаханбетовтің мәлімдеуінше, аталмыш дерек Абай ауданы әкімдігі мен полиция қызметкерлері бірлесіп жүргізген рейд кезінде анықталған. Тексере келгенде, төтенше жағдай режимі енгізілгеніне қарамастан, «Сарыарқа» дәмханасының әкімшілігі азаматтарды қабылдап, оларға қызмет көрсеткені белгілі болды.
Аталған жайт бойынша ҚР ӘҚБтК 476-бабы 6-тармағымен дәмхана әкімшілігі мен азпазына әкімшілік хаттама толтырылып, жинақталған істер Шымкент қаласының мамандандырылған әкімшілік сотына жолданған.
«Бұл жағдай кеше талтүсте «Сарыарқа» кафесінде болған. Ол аудандық полиция басқармасыың дәл жанында. Біздің қызметкер оны ашық тұр екен деп ойлап, «кіріп тамақ іштім» деді. Ол қызметкерді біз жұмыстан босаттық. Қазіргі таңда полицейлер арасындағы құқық бұзушылықтарды тауып, қатаң жазаға тартып жатырмыз»,- деді Ералы Жұмаханбетов.
Айта кетейік, бұған дейін екі полиция қызметтері блок-бекеттен кедергісіз өткізем деп тұрғындардан пара алғаны үшін қызметінен босатылған болатын.
