USD
«Қазатомөнеркәсіп» ұлттық атом компаниясы үшін 2022 жыл – мерейтой жылы. Компанияның құрылғанына 25 жыл толды. 1997 жылы жұмыс бастаған шағын компания бүгінде уран өндіру мен оны сату бойынша әлемдік көшбасшыға айналды. Қол жеткен жетістіктердің артында нағыз кәсіпқой мамандардан құралған еңбек ұжымдары тұрғаны анық. Сондықтан компания басшылығы еңбек адамына лайықты жағдай жасаумен қатар, өзі жұмыс істейтін өңірлердің өркендеуіне қомақты үлесін қосып келеді.
Бюджеттік төлемдер
Қызылорда облысының Жаңақорған және Шиелі аудандарында «Қазатомөнеркәсіпке» қарасты «Қызылқұм» ЖШС, «Хорасан-U» БК» ЖШС, «Байкен-U» ЖШС, «СКЗ-U» ЖШС, «РУ-6» ЖШС, «Семізбай-U» ЖШС, «KAP Logistics» ЖШС және «Волковгеология» АҚ сияқты кәсіпорындар жұмыс жүргізеді. Олар жергілікті тұрғындарды тұрақты жұмыспен қамтамасыз етумен бірге бюджетке төлейтін түрлі төлемдері арқылы аймақтың әлеуметтік-экономикалық дамуына да үлкен септігі тиіп отыр.
2019-2021 жылдары «Қазатомөнеркәсіп» кәсіпорындары Қызылорда облысының бюджетіне 928 млн теңге ақша аударды. Осындай төлемдер 2022 жылы да жасалатын болады.
Әлеуметтік жобалар
Жаңақорған ауданындағы «Қазатомөнеркәсіп» кәсіпорындары өндіріс орындарына жақын маңдағы «Байкенже» және «Билібай» ауылдарын өз қамқорлығына алған. Ауыл мен оның тұрғындарының мұң-мұқтажын әрқашан ескеріп, оң шешуге тырысатын кәсіпорындар аудан және ауыл әкімдіктерінің қолдауымен 2021 жылы жалпы сомасы 20,5 млн теңге болатын бірқатар әлеуметтік маңызы бар жобаларды іске асырды.
Атап айтқанда:
– «Байкенжеде» балалардың ойын және спорт алаңы салынды (15 160 668 теңге);
– 8 наурыз – Халықаралық әйелдер күні мерекесіне орай «Байкенже» мен «Билібайдағы» 59 анаға азық-түлік себеттері тапсырылды (300 000 теңге);
– Ауылдық клубта осы екі ауылдағы әйелдер мен қыздарға арналған мерекелік іс-шара ұйымдастырылды (1 200 000 теңге);
– 1 маусым – Балаларды қорғау күніне орай «Байкенжедегі» 9 балаға мерекелік сыйлықтар тапсырылды (500 000 теңге);
– 1 қазан – Қарттар күні құрметіне «Байкенже» мен «Билібайдағы» 50 қарияға азық-түлік себеттері тарту етілді (500 000 теңге);
– «Мектепке жол» акциясы аясында «Байкенже» мен «Билібайдағы» оқушылар үшін ішіне оқу-жазу құралдары салынған сөмкелер алынды (2 197 600 теңге);
– Аз қамтылған және көп балалы отбасылардағы 70 балаға, сондай-ақ «Байкенжедегі» жетім балаларға жаңажылдық сыйлықтар жасалды (300 000 теңге);
– «Байкенже» мен «Билібайдағы» 4 мүгедек балаға 100 000 теңгеден қаржылық көмек көрсетілді (400 000 теңге).
Жылда қайталанып тұратындықтан, бұл іс-шаралар дәстүрге айналып, 2022 жылы осы мақсатқа 6,3 млн теңге қаржы жұмсалды. «Қазатомөнеркәсіп» әлеуметтік жауапты компания ретінде аймақтардағы ахуалды үнемі назарда ұстап, айрықша қамқорлығын алдағы уақытта да жалғастыра бермек.
Жаңақорған аудандық әкімдігінің баспасөз қызметі
