USD
МӘСКЕУ. 6 қараша. РФ Сыртқы істер министрі Трамп белгілеген саммиттің өтпей қалуына байланысты Кремль қожайынының салқын қабағына тап болды. Бұл туралы The Moscow News ақпарына сүйенген rast.kz хабарлайды.
Ресейдің Сыртқы істер министрі Сергей Лавров АҚШ Мемлекеттік хатшысы Марко Рубиомен телефон арқылы сөйлесуі сәтсіз өткеннен кейін қаһарға ұшырап қалған сияқты. Себебі, мұның соңы бірден Владимир Путин мен Дональд Трамп арасындағы саммиттің тоқтап қалуына апарып соқтырды.
Сыртқы істер министрлігін 20 жылдан астам уақыт бойы басқарған 76 жастағы Лавров 5 қарашада Путин төрағалық еткен Ресей Қауіпсіздік кеңесінің маңызды отырысында отырмады.
Құрамына Лавров кірген Қауіпсіздік кеңесінің тұрақты мүшелерімен кездесуде Путин оларға Ресей соңғы рет 1990 жылы өткізген ядролық сынақтарды қайта бастау туралы ұсыныстарды қарастыруды тапсырды. «Коммерсант» мәнбесі газетке Лавровтың отырысқа «әдейі қатыспағанын» жазды. Сыртқы істер министрі маңызды кездесуді өткізіп алған Қауіпсіздік кеңесінің жалғыз тұрақты мүшесі болды.
Лавров сонымен қатар G20 саммитіндегі Ресей делегациясының басшысы мәртебесінен де айырылды. «Биыл оны Президент әкімшілігі басшысының орынбасары Максим Орешкин басқарады» деп атап өтті Кремльдің баспасөз хатшысы Дмитрий Песков бейсенбі күні. Оның айтуынша, Орешкинді тағайындау туралы шешімді Путин қабылдаған.
Президенттің өзі тағы да биыл Оңтүстік Африкада өтетін G20 саммитіне қатыспауға шешім қабылдады, өйткені бұл ел Рүм статутына қол қойған және Путинді Халықаралық қылмыстық соттың ордері бойынша тұтқындауы әбден мүмкін еді.
2025 жылы Халықаралық қылмыстық соттың ордеріне байланысты Путин Бразилияға, сондай-ақ БРИКС саммитіне барудан бас тартты. Ал 2022 жылы ол Балидегі G20 саммитіне қатыспады. Екі жағдайда да Лавров Ресей делегациясының басшысы болды.
Ресей дипломатиясының ардагері және БҰҰ Қауіпсіздік кеңесіндегі бұрынғы тұрақты өкіл Лавров 21 қазанда Рубиомен телефон арқылы сөйлесті, оның барысында Будапештте өтетін Путин мен Трамп саммитінің шарттарын талқылануы керек еді. Алайда Рубио Трампқа кездесуді болдырмауды ұсынды, ал саммит тоқтатылғаннан кейін АҚШ Ресейдің «Роснефть» пен «Лукойлға» компанияларына нкциялары енгізілді – бұл Трамптың Ақ үйге екінші қайтара оралғаннан бергі алғашқы санкциясы болды.
Жағдаймен таныс Reuters мәнбелері бұған Кремльдің «тым көп нәрсені қалап», Украинадағы атысты тоқтатуды қабылдамаған ымырасыз ұстанымы себеп болғанын айтады.
Рубиомен сәтсіз әңгімеден кейін Лавровтың өзі Киевтегі «нацистік режим» туралы тағы да сөз ете келіп, «қақтығыстың түпкі себептерін» шешуді талап етті. Лавровтың айтуынша, дереу атысты тоқтату Украинаның көп бөлігін «нацистік режимнің бақылауында қалдырады», ал Батыс Украина Қарулы күштерін «Ресейдің азаматтық инфрақұрылымына шабуыл жасау түріндегі террористік әрекеттер үшін» қару-жарақпен «таратады».
