USD
ТӨРЕТАМ. 18 қыркүйек. Қызылорда облысындағы Төретам теміржол вокзалы да бүгін қайта жаңғырылған қалпында пайдалануға берілді. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Осыған арналған салтанатты рәсімге Қызылорда облысының әкімі Мұрат Ергешбаев, Құрылтай депутаттары Серік Қожаниязов, Нұркен Бақытбекұлы, Мағжан Ералиев, Ирина Тен, сондай-ақ мәслихат депутаттары, зиялы қауым өкілдері мен ел ағалары қатысты.
Жиында сөз сөйлеген Мұрат Ергешбаев теміржол инфрақұрылымын дамытуға арналған мақсатты жұмыстарға тоқталып, вокзалдарды заман талабына сай жаңғыртудың тұрғындар үшін де, аймағымызға келетін қонақтар үшін де маңызы зор екенін атап өтті.
«Сыр өңірі – тоғыз жолдың торабында орналасқан, өңірлерді бір-бірімен жалғаған маңызды көлік дәлізі. Облыс аумағынан 15жолаушы пойызы өтеді. Облыс орталығынан Астана, Петропавл, Павлодар, Көкшетау, Семей, Түркістан қалаларына пойыз қатынайды», – деді Мұрат Нәлқожаұлы сөзінде.
Бүгін – қасиет қонған, Қорқыт баба дүниеге келген Қармақшы ауданында қуанышты күн жалғасты.
«Өздеріңізбен бірге аймағымыз үшін маңызы зор жобалар – Төретам және Жосалы теміржол вокзалдарын пайдалануға береміз. Ел игілігі жолындағы барлық бастамаға сәттілік тілейміз!Сондай-ақ осы нысанды күрделі жөндеуден өткізуге үлес қосқан азаматтарға алғысымызды білдіреміз.
Баршаңызға зор денсаулық, отбасыларыңызға амандық пен бақ-береке тілеймін! Еліміз аман, жұртымыз тыныш болсын!», – деді аймақ басшысы.
Рәсімде Құрылтай депутаты Мағжан Ералиев сөз сөйлеп, орын алып отырған шадыман шақпен жиналғандарды құттықтады. Қармақшы аудандық ардагерлер кеңесінің төрағасы Асқар Мереков бата берді.
Іс-шараның соңы теміржол саласы мен осы құрылысты жүргізген мердігер мекеменің қызметкерлерін облыс әкімінің Алғыс хатымен марапаттауға ұласты.
Төретам теміржол вокзалының тарихы Байқоңыр ғарыш айлағының құрылу және қалыптасу кезеңімен тығыз байланысты. Станция арқылы айлаққа қажетті құрылыс материалдары, жабдықтар және жүк тасымалданды.
Жаңғыртылған вокзал енді тәулігіне 250 жолаушыға қызмет көрсетеді. Күрделі жөндеу кезінде ғимараттың қасбеті мен іргетасы қапталып, шатыр жабыны, есік-терезелері ауыстырылды. Электр желілері жаңартылып, жылу жүйесі жүргізілді, заманауи талапқа сай жабдықталды.
Мұнда жолаушыларға арналған күту залы, мүгедектігі бар және балалы жолаушыларға арналған арнайы бөлмелер, медициналық пункт қарастырылған.
Қайта жаңғырту жұмыстарына 1 млрд теңге қаржы бөлінді.
