USD
АСТАНА. 13 маусым. Қазақстан Сыртқы істер министрлігінің ресми өкілі Айбек Смадияров Мұстафа Шоқайдың Берлиндегі зираты сүрілгелі жатқаны жалған екенін мәлімдеді. Бұл туралы «ҚазАқпарат» ақпарына сүйенген rast.kz хабарлайды.
«Әлеуметтік желіде Берлиндегі Мұстафа Шоқайдың зиратын бұзып, қиратып, басқа жерге көшіргелі жатқаны туралы жалған ақпарат тарап жатыр. Бұл ақпарат расталмайды. Өйткені, біздің елшіліктің қызметкері дереу барып, зират қызметкерлерімен сөйлесіп, фото, видеоға түсіріп, бәрін өз көзімен көріп келді. Мұстафа Шоқайдың зираты орнында. Ешқайда көшірілмейді. Сондықтан мұндай өтірік ақпарат таратуды тоқтату керек», – деді Айбек Смадияров.
Жалпы, ұлт көсемі Мұстафа Шоқайдың Берлиндегі бейітінің бұзылғалы жатқаны жайлы қауесет осылай оқта-текте бір шаң беріп тұрады. Мысалы, қазір сөз болып отырған видео бұдан екі жылдай уақыт бұрын тап осы нұсқасында тараған болатын. Ал мұндай жел сөз тәуелсіздіктің алғашқы жылдарынан бері қарай әредік бір бұрқ ете қалумен келеді.
