USD
МӘСКЕУ. 13 маусым. Ресей Украинамен жүріп жатқан соғыстың әр күні 65 млрд рубльден қаржы шашып, бұрын-соңды болмаған жаңа рекордқа қол ұрды. Бұл туралы The Moscow Times ақпарына сүйенген rast.kz хабарлайды.
«Ресейдің әскери шығындары 2026 жылдың бірінші тоқсанында жаңа рекордтық деңгейге – 5,908 триллион рубльге жетті», деп есептейді РФ Қаржы министрлігінің мәліметтеріне сілтеме жасаған Германияның халықаралық қауіпсіздік мәселелері институтының ғылыми қызметкері Янис Клюге.
Өткен жылдың осы кезеңімен салыстырғанда, армия мен қару-жарақ өндірісіне жұмсалған шығындар 29,9%-ға, 2024 жылғы қаңтар-наурызға қатысты – 68,7%-ға, 2023 жылмен салыстырғанда – 129%-ға, ал 2022 жылдың бірінші тоқсанына қарағанда, 4,6 есеге өскен.
«Нәтижесінде соғыс басталғаннан бері алғаш рет бюджеттегі әскери шығындардың үлесі 46%-ға барды. Басқаша айтқанда, әрбір екінші рубль армияға кетуде», – деп атап өтті Клюге.
Орташа алғанда, оның есептеулерінен көрініп тұрғандай, Ресей Федерациясының «соғыс машинасы» сағатына шамамен 2,7 миллиард рубльді, ал күніне 65 миллиард рубльді «жеп келеді», бұл – Новгород немесе Орел облыстарының жылдық бюджетімен бірдей (оларда сәйкесінше 69 және 61 миллиард рубль). Бір айлық соғыс шығындары – шамамен 2 трлн рубль – Ресейдің бүкіл жоғары білім беру жүйесінің (1,7 трлн) және Мәскеуден басқа барлық Ресей аймақтарының жылдық бюджетінен асып түсті.
Әскери шығындардың негізгі өсімі құпия баптарға түсті: олардың көлемі тоқсан қорытындысы бойынша 3,4-тен 4,9 трлн рубльге дейін өсті.
