USD
МӘСКЕУ. 21 тамыз. Ресейліктердің болашаққа деген сенімдерінің өлшемі өткен ғасырдың 90-шы жылдары деңгейіне дейін құлдырап кеткендері белгілі болды. Бұл туралы The Moscow Times ақпарына сілтеме жасаған rast.kz хабарлайды.
Ұзаққа созылған сұрапыл соғыс, экономикалық ахуалдың барған сайын нашарлай түсуі, дрондардың Мәскеуден Орал тауларына дейінгі атыраптағы мұнай зауыттары мен қоймаларын күнбе-күн шабуылдың астына алуы ресейліктердің ертеңгі бақытты күнге деген сенімдерінің тас-талқанын шығарды.
Мемлекеттік ВЦИОМ-ның 2026 жылғы шілдеде жүргізген сауалдамасы ел азаматтарының 66 пайызы алда Ресейді «қиын уақыттар» күтіп тұр деп есептейтінін көрсетті. Демек, жыл басынан бері күрделі кезең келетінін болжап отырған халықтың саны тағы 16 пайызға артқан.
Нәтижесінде қоғамның болашағы алдындағы пессимизм мен қорқыныштың деңгейі елдің қазіргі заманғы тарихындағы ең жоғары көрсеткішке жеткен.
ВЦИОМ-ның мәліметі бойынша 1991 жылы, КСРО тараудан бірнеше ай ғана уақыт бұрын оның халқының шамамен осыншама бөлігі (66-67%) өздерін «қиын уақыт» күтіп тұрғанын мәлімдеген. Ал 1992 жылы Одақ құлағаннан кейін жұрт жаппай жоқшылыққа ұшырап, 2500%-дық гиперинфляцияға ұрынған.
Украинаның алыстан берген соққылары Ресейді отын тапшылығына тап келтіріп жатыр. Олар осы кезге дейін Wildberries компаниясының 20 қоймасын өртеп жіберді. Оларды қалпына келтіріп беруге мемлекеттің мүлде шамасы жоқ. Бұл ресейліктердің психологиясына қатты әсер етіп отыр.
Парадокс мынада: бұдан ширек ғасыр уақыт бұрын билік басына келген Владимир Путин ең алдымен мемлекет қауіпсіздігін, жарылыстарсыз және кісі өлімдерінсіз тыныш өмірді қамтамасыз етуге уәде берген еді, бірақ ел тарихындағы ең қауіпті кезең тап осы Путиннің билігі тұсында орын алып отыр.
