USD
ҚЫЗЫЛОРДА. 10 тамыз. Қызылордада «10 тамыз – Абай күніне» орай «Абай мұрасы – ұлт руханиятының темірқазығы» атты облыстық байқау өтті. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Шара барысында қатысушылар мен қонақтар «Адамзаттың Абайы» атты көрме-инсталляциямен танысты. Көрмеде ұлы ақынның өмірі мен шығармашылығы, философиялық ойлары мен рухани мұрасы кеңінен таныстырылды.
Облыс әкімінің орынбасары Қайрат Нұртай байқауға қатысушыларды Абай күнімен құттықтап, ұлы ақын мұрасының жас ұрпақ тәрбиесіндегі және ұлттық руханиятты дамытудағы маңызына тоқталды.
Байқауға Қызылорда қаласы мен облыс аудандарынан жоғары және орта арнаулы білім беру ұйымдарының студенттері мен жастарынан құралған 8 команда қатысты.
Олардың қатарын мына топтар құрады:
«Зерттеушілер» тобы – Қызылорда қаласы;
«Кітап құрттары» тобы – Қызылорда қаласы;
«Сыр зергектері» тобы – Қазалы ауданы;
«Хәкім жолы» тобы – Қармақшы ауданы;
«Жеңіс» тобы – Жалағаш ауданы;
«Әділет» тобы – Сырдария ауданы;
«Мұрагер» тобы – Шиелі ауданы;
«Жалын» тобы – Жаңақорған ауданы.
Қатысушылар Абайдың қара сөздерін мәнерлеп айту, ақынның өмірі мен шығармашылығына қатысты сұрақтарға жауап беру, «Абай жолы» роман-эпопеясы бойынша қойылым көрсету және Абай әндерін орындау кезеңдерінде өз білімдері мен шығармашылық қабілеттерін сынға салды.
Байқау қорытындысы бойынша мына топтар жүлдегерлер атанды:
І орын – Қазалы ауданының «Сыр зеректері» тобы;
ІІ орын – Жалағаш ауданының «Жеңіс» тобы;
ІІІ орын – Жаңақорған ауданының «Жалын» тобы.
Жеңімпаздар мен жүлдегерлерге дипломдар, алғыс хаттар және бағалы сыйлықтар табысталды.
Айта кетейік, Абай күніне орай облыс көлемінде ұлы ақынның рухани мұрасын дәріптеуге және шығармашылығын кеңінен насихаттауға бағытталған бірқатар іс-шаралар ұйымдастырылуда.
