Қордайдағы жағдайға жол берген қызметкерлер жазаланады

АСТАНА. 9 ақпан. Қазақстан Президенті Қасым-Жомарт Тоқаев Қордай ауданындағы жағдай тұрақты екенін айтты. Бұл туралы «ҚазАқпарат» хабарлады.

«Қордай ауданындағы жағдай тұрақты. Бердібек Сапарбаев басқарған комиссия жұмысын жалғастыруда. Қайғылы жағдайға жол берген меморган қызметкерлері мен арандатушылар жауапқа тартылады. Зардап шеккендерге көмек көрсетіледі. Отандастарымызға азаматтық жауапкершілік ұстанымдары үшін ризашылық білдіремін», – деп жазды Мемлекет басшысы.

Еске сала кетсек, 7 ақпанда Қордай ауданындағы Масанчи ауылында жаппай төбелес болған. Президент Қасым-Жомарт Тоқаев осыған қатысты пікір білдірді.

«Қоғамдық тәртіпті бұзғандар жауапкершілікке тартылады», деп жазды ол Twitter парақшасында.

Сенбі, 8 ақпанда Мемлекет басшысы Жамбыл облысындағы оқиғаға байланысты мәлімдеме жасады. Оның тапсырмасымен Қордай ауданындағы оқиға салдарын жою жөніндегі Үкімет комиссиясы құрылды.

Ішкі істер министрі Ерлан Тұрғымбаев пен Ақпарат және қоғамдық даму министрі Дәурен Абаев Қордай ауданындағы жанжалға қатысты ОКҚ-да баспасөз мәслихатын өткізді. «8 адам көз жұмды. 40-тан астам адам жарақат алды», – деді Ішкі істер министрі.

Кейін ауруханада жатқан тағы 2 адамның қайтыс болғаны анықталды.