USD
АСТАНА. 23 маусым. Бүгін Қазақстанда «Заң мен тәртіп» жаңа цифрлық сервисі жұмысын бастады. Бұл туралы Polisia.kz ақпарына сүйенген rast.kz хабарлайды.
Ішкі істер министрлігі «Заң мен тәртіп» атты жаңа цифрлық сервисті іске қосты – енді азаматтар құқық бұзушылықтар туралы полицияға тікелей Egov Mobile қосымшасы арқылы хабарлай алады.
Қосымшаның басты бетіне арнайы «Заң мен тәртіп» түймесі орнатылған. Тақырыпқа қатысты хабарламаны сол арқылы жедел жолдауға болады. Өтініш берудің жолы оңай. Қоғамдық тәртіпті бұзу, тұрмыстық зорлық-зомбылық, жол-көлік оқиғасы немесе балаға төнген қауіп сияқты жағдайлар жайындағы дабыл бірден полицияға түседі, соған сай полиция қызметкерлері хабар түскен сәттен іске кіріседі.
Мұндай түймелер кейбір банк қосымшаларына да интеграцияланған, бұл сервисті кең аудитория үшін қолжетімді етеді.
Жоба ІІМ жүргізіп жатқан ауқымды цифрландыру процесінің бір бөлігіне айналды. Мақсат – полиция мен азаматтар арасындағы өзара әрекеттестікті жеңілдету және жеделдету, жедел әрекет ету деңгейін арттыру және көмекті барынша қолжетімді ету. Сервис тәулік бойы жұмыс істейді, өтініштер бүкіл ел аумағында қабылданады.
