USD
АЛМАТЫ. 25 маусым. Қазақстан Журналистер одағы өзінің 2026 жылғы сыйлық және марапат иелерін анықтап, баспасөз бетінде жария етті. Бұл туралы Orda.kz ақпарына сүйенген rast.kz хабарлайды.
«Қазақстан Журналистер одағы «Қазақстанның құрметті журналисі» атағы иегерлерін, одақтың алтын медалін алғандар мен 2026 жылғы кәсіби сыйлық лауреаттарын жариялады», – делінген хабарламада.
Қазақстан Журналистер одағының төрағасы Сейітқазы Матаев (суретте) құттықтау сөзінде журналистика әлемдегі ең қауіпті мамандықтардың бірі болып қала беретінін атап өтті. Оның айтуынша, журналистер тек қақтығыс аймақтарында ғана емес, бейбіт елдердің өзінде де қысымға, сот процестеріне, қылмыстық қудалауға және түрлі қауіп-қатерге тап болады.
«Егер елдегі және әлемдегі оқиғаларға тәуелсіз әрі сыни көзқарасты ұстанатын барлық журналистер қуғын-сүргінге ұшырай берсе, онда журналист мамандығына мүлде тыйым салған оңайырақ болар еді. Өйткені билікті мадақтайтын мәтіндерді жасанды интеллект те жаза алады» деп жазылған үндеуде.
Биыл «Қазақстанның құрметті журналисі» атағы елдің әр өңірінен 21 БАҚ өкіліне берілді. Олардың қатарында Вадим Борейко, Ахметжан Срапылов, Марат Жұмабаев, Бақтияр Тайжан және басқалар ерекше көрінеді.
Қазақстан Журналистер одағының Алтын медалімен 17 адам марапатталды. Олардың қатарын журналистер, дәрігерлер, өрт сөндірушілер, еріктілер, меценаттар, құтқарушылар және қоғам қайраткерлері түзеді.
Марапатталғандардың қатарында қазір тергеу астында жүрген «ҚазТАГ» ХАА бас редакторы Әмір Қасенов та бар.
Сондай-ақ марапаттар эковолонтер Тәңір Яссаға, құтқарушылар Айбар Камидуллиевке, Фархат Тажиевке және Аслан Дүйсеновке, жедел жәрдем дәрігері Ақмарал Шахановаға, хирург Санжар Жағыпаровқа, меценаттар мен асырап алған балаларды тәрбиелеп отырған көп балалы отбасыларға табысталды.
Жеке атап өтетін жағдай: футболшы әрі балалар жаттықтырушысы Әлібек Жүсіпов Қазақстан Журналистер одағының Алтын медалімен қаза болғаннан кейін марапатталды. Ол 2025 жылы Павлодар – Астана тасжолында орын алған жол-көлік апатында автобустағы жас спортшыларды құтқару кезінде қаза тапты.
Қазақстан Журналистер одағы сыйлығы байқауының лауреаттары қатарында әр өңірден журналистер мен авторлар да бар. Олардың ішінде Жансая Есмағанбетова, Әсия Нұрлыбаева, Лаура Түсіпбекова, Илья Пащенко, Федор Ковалев және басқалар есімдері аталады.
Сонымен қатар байқаудан тыс «Elmedia» жобасы, «Жалғыз жолаушы» жобасы және «Астана» телеарнасының көпбалалы әрі интернационал отбасылар туралы бағдарламалар циклі де аталды.
