USD
МӘСКЕУ. 26 маусым. РФ президенті Владимир Путиннің жақын серіктестерінің бірі, жиырма жылдан астам уақыт Үкімет пен Кремльде жоғары лауазымдарда болған Сергей Иванов бүгін 74 жасында қайтыс болды. Бұл туралы The Moscow Times ақпарына сүйенген rast.kz хабарлайды.
Сергей Иванов 1953 жылы 31 қаңтарда Ленинград қаласында туған.
Екі құрдас, екі жерлес – Иванов пен Путин 70-ші жылдары Ленинград КГБ басқармасында жұмыс істеген кездерінде кездесті. 90-ші жылдары, Путиннен айырмашылығы, Иванов барлау қызметтерінде қалып, сыртқы барлауда жұмыс істеді. 1998 жылы ФСБ басшысы болғаннан кейін Путин Ивановты өзінің орынбасары етіп алды.
Қаусаған Борис Ельцин Путинді «мұрагер» етіп таңдап, оны Үкімет басшысы етіп тағайындаған кезде, ол Ивановты Қауіпсіздік кеңесінің хатшысы етіп әкеп қойды, ал президенттік креслоны алғаннан кейін Қорғаныс министрлігіне басшы етіп бекітті.
Иванов жас кезінде армияда бір ай ғана қызмет еткенімен, 2007 жылға дейін әскери ведомствоны басқарды, ол төрт жыл премьер-министр бола тұру үшін президенттіктен кетуге мәжбүр болған Путиннің «мұрагерлеріне» басты үміткер болып саналды.
Алайда Сергей Иванов Кремльдің «тағында» уақытша отыру үшін туған бәсекеде Дмитрий Медведевтен жеңіліп, вице-премьер болды, ал Путин Кремльге қайта оралған 2012 жылдан кейін оның әкімшілігін басқарды.
Ивановтың жұмысқа деген көзқарасы 2014 жылы Біріккен Араб Әмірліктерінде «Внешэкономбанк» төрағасының орынбасары болып жұмыс істеген үлкен ұлы Александр қайтыс болған кезде өзгерді. 2016 жылы Иванов «құрметті доғарысқа» – президенттің табиғатты қорғау қызметі, экология және көлік мәселелері жөніндегі арнайы өкілі лауазымына кетті.
Сергей Иванов бұл қызметтен 2026 жылдың ақпанында кетті. Ол осы кезде қатты ауырды деген қауесет бар. Оның өлімінің себебі «ВТБ Бірыңғай лигасы» хабарламасында көрсетілмеген.
