USD
МӘСКЕУ. 2 қаңтар. РФ диктаторы Владимир Путин украин армиясының Белгородқа шабуылына «теракт» деген баға беріп, енді Киевтің орталығына соққы жасағылары келетінін мәлімдеді. Бұл туралы The Moscow News дерегіне сүйенген rast.kz хабарлайды.
«2023 жылғы 30 желтоқсанда Украина Қарулы күштері тарапынан Белгородтың атқылануы – теракт», – деді нөмірі бірінші терроршы.
«Өйткені, олар мұны «Ольханың» екі ракетасының қолдауымен жасап, дүркін отты жүйеден соққы берді <…> Бұл – алаңдар бойынша соққы беретін қару, олар осы қарумен Жаңа жылды тойлап жүрген халықты көздеп, қала алаңдарын атқылады», – деп гуілдеді Путин құдды бір өзі ешқашан алаңдарды, ауруханаларды, балалар бақшаларын, мектептерді, перзентханаларды, көп қабатты үйлерді, энергетикалық нысандарды атқылап көрмеген адам сияқтанып.
Делқұлы диктатордың пікірінше, жау «осындай соққылар беру арқылы ресейліктерді қорқытып, олардың елге деген сенімдеріне сызат түсіргілері келеді». «Біз, әрине, бұған жауап ретінде Киевтің орталығын, басқа кез келген қаласын атқылай аламыз, қазір менің ішім қайнап барады, бұлайша бейбіт тұрғындарға қалай соққы беруге болады? Жоқ, біз әскери нысандар бойынша соққы жасаймыз, солай етеміз», – деп теңселді ол тағы «періште кейпіне» енуге әрекет етіп.
Диктатор өз сөзінде Украинаны атқылауды арттыратындарын ашып айтты.
Путин сонымен бірге Ресейдің үздіксіз соғыса бергісі келіп отырмағанын да баяндады. Лекін, өз позицияларын да бергілері келіп отырған жоқ. Демек, басып алған жерлерін қайтаруға құлықты емес. Дегенмен, Мәскеу жанжалды «мейлінше тезірек аяқтауды» қалайды. «Бірақ бұл біздің ғана қолымызда тұрған жоқ», – деп атап өтті узурпатор.
Белгород қаласының орталығы 30 желтоқсан күні атқылауға алынды. Нәтижесінде 24 адам қаза тауып, 108 адам жарақат алды.
