USD
МӘСКЕУ. 27 маусым. Күні кеше Пригожиннің бүлігінен ең көп зардап шеккен РФ қорғаныс министрі Сергей Шойгудың төңірегінен тағы бір даудың оты қау ете қалды. Бұл туралы ресейлік ресурстардан дерек алған rast.kz хабарлайды.
«Ресейлік БАҚ-тарда Пригожиннің бүлігі төңірегіндегі шулы жанжалдың фонында Шойгудың Рублевкадағы жылжымайтын элиталы мүліктерінің суреттері «су бетіне қалқып» шыға келді», – деп жазды «Агентство» сайты.
Ресей қорғаныс министрі Шойгудың төңірегінен жаңа бір жанжал бұрқ ете қалды – журналистер оның Мәскеу түбіндегі Рублевка аймағынан зәулім сарайын тауып алды. Бұған қоса, «Агентство» тілшілерінің қолдарына министрдің құны әлденеше миллион доллар тұратын кең ауқымды қонысының рәсімдері түсе кетті.
Жарияланған фото-материалдарға қарағанда, үйдің «тыва» стилінде салынғаны аңғарылады. Қалай дегенде де, оның шатыры тыва және моңғол хандары мен кінәздарының құтханаларындағы жабынға ұқсайды.
Зәулім сарайдың ішінде бірден екі бассейн салыныпты, одан бөлек, аквариумдар мен орасан зор камин пеші тұр. Үйдің ішкі жағының бәрі ағашпен апталған. Журналистер сарай суреттеріне қарай отырып, оны «Леонардо Проект» архитектуралық бюросы жасағанын анықтады. Ал үйдің Шойгуге тиесілі екенін таныс архитектор айғақтап берген.
Суреттерді егжей-тегжейлі зерттей келгенде, журналистер жатын бөлмелердің, кітапхананың, сондай-ақ бильярдхана мен холлдың ерекше безендірілгеніне көз жеткізді.
Ресей қорғаныс министрлігінің жемқорлыққа әбден батқаны жайлы көптен бері жазылып келеді. Бұрынғы министрлер мен олардың ойнастары жайлы да талай айтылған. Мұндай «ықыластан» Шойгудың ұлы Сэргек те әсте тыс қалған емес.
Қазір журналистер сол Шойгудың мына зәулім сарайды қай ақшасына салғанын анықтай алмай, дал болып жатыр.
