USD
АЛМАТЫ. 20 маусым. Алматыда қазақ тілін тәрк етіп, супермаркет қызметкерлеріне ұрыс шығарған шалағай ойлы шатақ әйелге айыппұл түрінде жаза белгіленді. Бұл туралы rast.kz хабарлайды.
Инцидент мегаполистегі Small желісі супермаркеттерінің бірінде орын алды. Алдын ала мәлімет бойынша, ол кассадан басталған. Тұтынушы әйел дүкенде істеп тұрған кассаның аздығына ашу білдіріп, мұны әкімгердің түсіндіруін талап еткен. Ал қызметкер оған қазақ тілінде жауап берген. Көп ұзамай екінші кассир келген, алайда бұл тұтынушы әйелдің ашуын күшейте түскен.
«Маған орыс тілінде жауап беріңдер. Мен сендерге орыс тілінде сұрақ қойып тұрмын, – дейді ол әкіреңдеп. Мұнысын және бірнеше рет қайталап айтты. Құдды бір Нұрсұлтан Назарбаевтың тақтан кетерінен сәл уақыт қана бұрын теледидардан көрсетілген үлкен аудиторияның қатысуымен өткен бір жиында «Орыс тілінде келген сұраққа қазақ тілінде жауап бергендеріңнің әкелеріңді танытам!» деген ләмде зіл тастап, у мен зәрін шашқанын есінде өте жақсы сақтап қалған сияқты. – Әдепті болыңдар».
Әйел соның арасында тағы «осы видеоны «әлеуметтік желіде жариялағанымнан кейін әлі көресіні көресіңдер» деген сыңайда қоқан-лоққы жасап қойды. Алайда аталмыш ролик эфирге тараған бойда оны емес, желі пайдаланушылардың кемінде 95 пайызы магазин қызметкеріне қолдау көрсетіп, сатып алушы әйелдің әрекетін қатты сынға алды. Олардың да біразы өзінің әрекетінің жөн екеніне сенімді, сол себепті менмен, өктем, арсыз әйелді шұғыл қылмыстық жауапкершілікке тартуды талап етті.
Көп ұзамай Алматы полиция департаментіндегілер жанжалға қатысушылардың жеке тұлғалары анықталғанын мәлімдеді. Ол Алматы қаласының 1964 жылы 22 тамызда туған Лисс Галина Николаевна деген тұрғыны болып шықты. Ал оған өте байсалды түрде қазақ тілінде жауап беріп тұрған сатушы қыздың есімі Жансұлу екен. Көпшілік осы қасиеті үшін оған алғыс айтып жатты.
«Әйелге қатысты әкімшілік өндірісінің материалдары жинақталды. Соттың шешімімен ол 20 айлық есептік көрсеткіш көлемінде айыппұл төлеу түріндегі әкімгершілік жауапкершілікке тартылды», – деп хабарлады полициядағылар. Бұл 85 500 теңге мөлшеріндегі соманы құрайды.
Құқық қорғаушылар Галина Лисске қоғамда алауыздық туғызуға қауқарлы агрессиялардың, арандатулар мен әрекеттердің орын алуларына жол беруге болмайтынын және ондайлардың жолдары заң жүзінде кесілетінін түсіндіріп айтты.
