USD
МӘСКЕУ. 7 мамыр. Бұрынғы КСРО-дан тараған елдердің басшылары 2022 жылдан бері биыл бірінші рет Мәскеудегі Жеңіс шеруіне қатыспайтын болып отыр. Бұл туралы The Moscow Times ақпарына сүйенген rast.kz хабарлайды.
ТМД, ЕАЭО және ҰҚШҰ әскери блогына кіретін бұрынғы кеңестік республикалар басшылары Мәскеудегі Қызыл алаңда 2026 жылғы 9 мамырда өтетін Жеңіс парадына қатыса алмайтындарын мәлімдеді.
Бұрынғы КСРО елдері атынан тек жалғыз Беларусь президенті Александр Лукашенка ғана шеруден қалмайды.
Ал қалғандары түгел Кремльдің шақыруын тәрк етіп отыр. Атап айтқанда, Қазақстан президенті Қасым-Жомарт Тоқаев, Қырғызстан президенті Садыр Жапаров, сондай-ақ үш жыл қатарынан (2023-25 жж.) шерулерге қатысқан Өзбекстан президенті Шавкат Мирзиёев бұл жолы Мәскеуге қарай құстай ұшпайтын болды. Меймандар арасынан Тәжікстан президенті Эмомали Рахмон мен Түрікменстан Президенті Сердар Бердімұхамедов те табылмайды. Екеуі де соңғы үш жылдағы шерулерге арнайы келген.
2023 және 2025 жылдардағы шерулерге қатысқан, бірақ 2024 жылы болмаған Армения премьер-министрі Никол Пашинян биыл да Ресейге барудан бас тартты. Соңғы рет мұндай шараға бұдан 11 жыл бұрын келген Әзербайжан презмденті Ильхам Әлиев биыл да Мавзолей қабырғасында тұрмайды.
Шеруде бұрынғы КСРО елдері көшбасшыларының саны 2022 жылдан бері ең аз болғалы тұр. Содан кейін Путинге бірде-бір шетелдік мемлекет басшысы келген жоқ, ол шеру колонналарын жалғыз өзі қарсы алды.
Кремльдің хабарлауынша, Путиннің көңілін 7 шетелдік қонақ аулайды, олардың тек төртеуі ғана халықаралық деңгейде танылған мемлекеттерден келеді. Олардың қатарыннда Лукашенкадан бөлек, Лаос жетекшісі, Словакия премьер-Министрі және Малайзия королі бар. Сондай-ақ, Мәскеу Сербия президенті мен өздерін-өзі жариялаған суайт құрылымдар – Абхазия мен Оңтүстік Осетия басшыларын күтеді.
Шеру-2026 Мәскеуде 19 жылдан бері алғаш рет әскери техникасыз өткізіледі. Танктер мен зымыран кешендерінің орнына Қызыл алаңан шеру колонналары өтеді.
