USD
ПАВЛОДАР. 17 маусым. Павлодарда өз перзентін бірнеше жыл бойы соққыға жығып келіп, ақыр соңында азаптап өлтірген ер адам өмір бойына сотталу жазасына кесілді. Бұл туралы Zakon.kz ақпарына сүйенген rast.kz хабарлайды.
Іс материалдары бойынша, қайғылы оқиға 2025 жылдың қыркүйегінде орын алған.
Павлодар облысының қылмыстық істер жөніндегі мамандандырылған ауданаралық соты кәмелетке толмаған баланы азаптау және өлтіру айыбы тағылған К.-ға қатысты қылмыстық істі қарады.
Сот материалдарына сәйкес, ер адам ұзақ уақыт бойы өз баласына жүйелі түрде дене жарақаттарын салып келген. Ал 2025 жылдың қыркүйегінде мас күйінде жасөспірім баланы аса қатыгездікпен азаптап өлтірген.
«Сотталушының кінәсі жәбірленушінің, куәлардың айғақтарымен, сараптама қорытындыларымен және қылмыстық істің өзге материалдарымен толық дәлелденді», – деді облыстық қылмыстық істер жөніндегі мамандандырылған ауданаралық соты.
Мемлекеттік айыптаушы сотталушыны қылмыстық құқық бұзушылықтар жиынтығы бойынша кінәлі деп танып, өмір бойына бас бостандығынан айыру жазасын тағайындауды сұраған. Жәбірленуші тарап 5 миллион теңге көлемінде моральдік шығын өндіру туралы талап қойған.
Ал сотталушы мен оның қорғаушысы істі қайта саралап, жеңілірек бап бойынша жаза тағайындауды сұраған.
Сот үкімімен К. қылмыстық құқық бұзушылықтардың жиынтығы бойынша кінәлі деп танылып, қылмыстық-атқару жүйесінің төтенше қауіпсіздік мекемесінде өтеумен өмір бойына бас бостандығынан айырылды. Сонымен қатар жәбірленушінің 5 миллион теңге көлеміндегі азаматтық талабы толық көлемде қанағаттандырылды.
Үкім әлі заңды күшіне енген жоқ.
