USD
АСТАНА. 27 наурыз. Денсаулық сақтау министрі Ақмарал Әлназарова батысқазақстандық дәрігер Таубай Байжекеновке әлеуметтік желі арқылы өзінің алғыс сезімін білдірді. Бұл туралы Денсаулық сақтау министрлігі баспасөз қызметінің дерегіне сүйенген rast.kz хабарлайды.
Батыс Қазақстан облысының көп бейінді ауруханасының дәрігері Таубай Байжекенов Астанадан Оралға ұшып бара жатқан ұшақ бортында толғағы басталған жүкті әйелге медициналық көмек көрсеткен.
«Кеше Астана–Орал рейсінде ерекше жағдайға тап болдым. Ұшу кезінде жүктіліктің 27-аптасындағы әйелде мерзімінен бұрынтолғату басталды. Суы кетіп, жедел түрде медициналық алғашқы көмек көрсетуге тура келді. Мұндай сәттерде дәрігер үшін сабыр сақтап, бар білім мен тәжірибені дұрыс қолдану аса маңызды. Нәтижесінде ұл бала дүниеге келді. Барлығы сәтті аяқталды.
Осындай сәттер менің мамандығымның қаншалықты жауапты әрі маңызды екенін тағы да еске салады», – деп жазды дәрігер Threads желісіндегі парақшасында.
Әуе кемесінің экипажы астананың әуежайына кері қайту туралы шешім қабылдап, жүкті әйелді жедел жәрдем қызметіне тапсырды.
Денсаулық сақтау министрі Ақмарал Әлназарова осы оқиғаға байланысты Батыс Қазақстан облыстық көп бейінді ауруханасының қабылдау бөлімінің хирургі Таубай Байжекеновке жоғары біліктілігі, қайсарлығы және дәрігерлік борышына адалдығы үшін шынайы алғыс сезімін білдірді.
