USD
ҚЫЗЫЛОРДА. 31 шілде. Қызылорда облысының әкімі Нұрлыбек Нәлібаев Мемлекет басшысының сайлау алды бағдарламасын іс жүзіне асырудың барысын талқылаған жиын өткізді. Бұл туралы облыстық қоғамдық даму басқармасының дерегіне сүйенген rast.kz хабарлайды.
Айта кетуіміз керек, бүгін, 31 шілде күні Премьер-министр Әлихан Смайыловтың төрағалық етуімен Президенттің сайлау алды бағдарламасын іске асыру жөніндегі республикалық штабтың отырысы болып өткен еді. Онда тиісті министрлер мен облыстар әкімдері студенттер жатақханаларындағы орын тапшылығы мәселесін шешу, «Ауыл аманаты» жобасын іске асыру барысында атқарылып жатқан жұмыстар жайлы баяндады.
Штаб отырысынан кейін облыс әкімі Нұрлыбек Нәлібаев шұғыл мәжіліс өткізіп, онда Үкімет отырысында сөз болған мәселелерді алға тартты. Осыған орай жауапты сала басшыларына нақтылы тапсырмалар берді.
«Бүгінгі республикалық штаб отырысында Үкімет басшысы студенттік жатақханалардағы орын тапшылығы мәселесін шешу үшін тиісті шаралар қабылдауды тапсырды. 2022-2023 оқу жылында облыстағы жоғары оқу орындарында, техникалық және кәсіптік білім беру ұйымдарында 36 238 студент білім алды. Оның ішінде 5 793 студент жатақханамен қамтылған. Аймақтың 30 колледжіндегі 20 672 студенттің 3646-сына жатақхана берілген. Облыс орталығы мен аудандардағы колледждер жатақханаларында орын тапшылығы мәселесі болмауы тиіс. Жергілікті кәсіпкерлермен бірлесіп, колледждердегі жатақхана қажеттілігі мәселесін жедел шешу үшін шара қабылдаңыздар», – деді облыс әкімі.
Жаңа оқу жылында Қорқыт ата атындағы Қызылорда университетіне шетелдік студенттердің қабылдануы, студенттер санының өсуіне орай жатақханаларда орын тапшылығы болуы ықтимал.
Осыны ескеріп, жаңа оқу жылы басталғанға дейін мәселені жедел шешу жүктелді. Мемлекеттік-жекеменшік әріптестік аясында кәсіпкерлермен келіссөздер жүргізіп, жаңа жатақханалар салу мәселесін қарау қажет. Облыстық білім басқармасына Арал индустриалды-техникалық колледжінің 75 орындық жатақханасын жаңа оқу жылына дейін пайдалануға беру міндеттелді. Бұдан бөлек, Қазалы аграрлы-техникалық және Қызылорда көпсалалы жоғары колледждеріне қажетті жатақхана құрылыстарын кәсіпкерлермен бірлесіп жүргізуді қолға алу тәкпір етілді.
Облыс әкімі бағдарламаны тиімді және мақсатты пайдаланып, ауыл халқының табысын арттыруда жоғары көрсеткіштерге қол жеткізуді тапсырды.
Дамир ҚОЖАМҚҰЛ
