USD
МЮНХЕН. 17 мамыр. Мюнхеннің «Бавария» футбол клубы түнде өз алаңында «Көлнді» 5:1 есебімен тізе бүктіріп, Германия бундеслигасында 35-ші мәрте топ жарды. Бұл туралы DW ақпарына сүйенген rast.kz хабарлайды.
«Неміс толқыны» (DW) радиосы хабарлағандай, Дойчландта 2025-2026 жылдардағы футбол чемпионаты аяқталды. Оның қорытындысында Мюнхеннің «Бавария» командасы 35-ші рет жеңімпаз болды. Клуб ойыншылары биылғы маусымда 122 гол соғып, бундеслига тарихындағы тағы рекордты жаңартты.
Соңғы матч Мюнхенде ойналды. «Бавария» өз алаңында Көлннің «Көлн» футбол клубын 5:1 етіп, ойсырата ұтты. Турнир қорытындысы бойынша бавариялықтар 89 ұпай жинады. Сөйтіп, чемпиондық тұғырға көтерілді.
Чемпионатта 73 ұпай алып, 70 гол соққан, мюнхендіктердің соңғы жылдардағы ең басты қарсыластарының бірі болып келе жатқан Дортмундтың «Боруссиясы» екінші орынға орналасты. Үшінші орынға 65 ұпайды қоржынға салып, 66 рет қақпаны дәл көздеген Лейпцигтің «РБ Лейпциг» клубы жайғасты. Ол бұрынғы ГДР елінен келіп қосылған командалар арасындағы ең табыстысы болып тұр.
«Баварияның» биылғы голдары саны – бундеслига тарихындағы ең жоғарғы көрсеткіш. Мюнхеннің бас футбол клубы биыл 1971/1972 жылғы чемпионатта тіркеген өз рекордын жаңартып отыр. Сол маусымда жеңімпаз жасақ 101 гол соққан еді. Команданың бас мергені Герхард (Герд) Мюллер 40 голдың авторы атанған.
Айта кететін тағы бір жайт, чемпиондық атақ алу жөнінен де ешкім «Баварияға» шендес келе алмайды. Қалғандарының көрсеткіштері бұдан көп төмен. Оны мына кестеден көруге болады: «Боруссия» (Дортмунд) – 5, «Боруссия» (Мёнхенгладбах) – 5, «Вердер» (Бремен) – 4, «Гамбург» – 3, «Штутгарт» – 3, «Кёльн» – 2, «Кайзерслаутерн» – 2.
