USD
ЕРЕВАН. 8 маусым. Армения парламент сайлауында абсолютті жеңіске жеткен «Азаматтық келісім» партиясы енді үкіметті де өзі құрып шыға алатындай қауқарға қол жеткізді. Бұл туралы РБК ақпарына сүйенген rast.kz хабарлайды.
Сайлау қорытындылары шыққаннан кейін премьер-министр Никол Пашинян Ресейден қуат алып отырған «соғыстың үш басты партиясы» күйрей жеңілгенін баяндап, «Азаматтық келісімнің» болашақ үкіметті ешкімнің араласуынсыз жеке-дара құратынын мәлімдеді.
Армения премьер-министрі Никол Пашинян парламент сайлауы нәтижесінде «Азаматтық келісім» партиясының көпшілік дауысқа ие болып, үкімет құратынын жеткізді.
«Армения халқы 7 маусымда парламенттік сайлауда дауыс беру арқылы мемлекетті, тәуелсіздікті, болашақты, бейбітшілікті, Армения Республикасын қорғап қалды», – деді Пашинян парламенттегі бюджеттік талқылауларда.
Оппозициялық партиялар туралы сөз қозғалғанда, ол «үш басты соғыс партиясы» жеңілді деп мәлімдеді.
«Бұл маңызды нәрсе, бірақ түпкілікті нәтиже емес, өйткені халық сайлауда өзінің «үш басты соғыс партиясының» және онымен бірге жүретін қылмыстық-олигархиялық жүйенің тамырына балта шабылуы тиіс деген нақты ерік-жігерін білдірді», – деп атап өтті Никол Пашинян.
Ол бұл мәселені көп кешіктірілмей және «өте шешімді қадамдармен» жүзеге асырылуға тиісті «саяси көпшілік шарасы және үкіметтің күн тәртібіндегі аса маңызды мәселелерінің бірі» деп атады.
8 маусым күні таңертең Армения ОСК барлық 2005 сайлау учаскелерінде дауыс беру қорытындылары бойынша алдын ала деректерді жариялады. Осы мәліметтерге сәйкес, парламентке төрт саяси күш өтті. Атап айтқанда, «Азаматтық келісім» партиясы – 49,81%, «Күшті Армения» блогы – 23,29%, «Армения» блогы – 9,94% және «Гүлденген Армения» партиясы 4% пайыз дауыс алды.
Алайда кейінірек Ұлттық жиналыстың бұрынғы вице-спикері Арпине Ованнисян ханым ОСК мәліметтеріне жүгіне отырып, «Гүлденген Арменияның», анықталған деректер бойынша, 3,996% дауыс жинап, ең төменгі шектен өте алмағанын баяндады. Мұны ОСК райысы Ваагн Овакимян да растады.
Осыған орай Ованнисян парламенттегі 64 мандаттың «Азаматтық келісім» партиясына (Никол Пашинян), 29 мандаттың «Күшті Армения» блогына (Самвел Карапетян), 12 мандаттың «Хайастан» альянсына (Роберт Кочарян) тиесілі екенін атап өтті.
Енді осыған орай бірінші партия үкіметті де, премьер-министрді де өзі бекіте береді. Ол сондай-ақ конституциялық заңдарды қабылдау құқына да ие болады, жоғары лауазымды бірқатар тұлғаларды сайлай да алады. Конституцияға тиісті өзгерістерді енгізу үшін де ешкімге жалынып жатпайды.
Пашинян партиясы, міне, бұл сайлауда осындай ғаламат жеңіске қол жеткізіп отыр.
