USD
АРАЛ. 12 шілде. Бүгін Қызылорда облысының Арал қаласында жоғары сұрыпты ас тұзын өндіру зауыты салтанатты жағдайда қатарға қосылды. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Жаңа зауыттың ашылу рәсіміне Қызылорда облысының әкімі Мұрат Ергешбаев, облыс прокуроры Ризабек Ожаров, сондай-ақ бір топ зиялы қауым өкілдері мен ел ағалары қатысты.
Жиында аймақ басшысы жиналған жұртшылықты осы қуанышты оқиғамен құттықтап, өндіріс орнының жұмысына сәттілік тіледі.
«Баршаңызды жоғары сұрыпты ас тұзын өндіру зауытының ресми ашылуымен құттықтаймын. Сондай-ақ маңызды жобаны Арал ауданында жүзеге асырғаны үшін жеке инвесторға зор ризашылығымды білдіремін. Бұл – еліміздің экспорттық әлеуетін арттыратын, жаңа жұмыс орындары ашылатын маңызды жоба. Өндіріс орындары экономиканы әртараптандыруға, тұрғындарымыздың өмір сүру сапасын арттыруға тың серпін береді деп сенемін», – деді Мұрат Нәлқожаұлы.
«Тоғыс – Арал отын» жауапкершілігі шектеулі серіктестігі (басшысы Мейрамбек Жұмашев) жоғары сұрыпты ас тұзын өндіру зауытына 1,8 млрд теңге қаржы салған, жылдық қуаттылығы – 40 мың тонна. Мұнда 20 адам жұмыспен қамтылады. Мемлекеттік қолдау аясында 4 гектар жер телімі беріліп, қажетті инфрақұрылым тартылды. Зауыт өнімдері ішкі нарықты қамтамасыз етумен қатар, көршілес мемлекеттерге де экспортқа шығарылады.
Шарада облыс прокуроры Ризабек Ожаров, ел ағалары Имамадин Оңғарбаев, Нұралы Оспанов сөз сөйледі. Соңында ауданның әлеуметтік-экономикалық дамуына, зауыттың іске қосылуына атсалысқан азаматтарға облыс әкімінің Алғыс хаты тапсырылды.
