USD
АРАЛ. 25 мамыр. Қызылорда облысының Арал қаласында шығармашыл әрі креативті жастардың басын қосқан «Жайдарман» ойынының финалдық кезеңі мәреге жетті. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Аталған шараны «Ауыл» партиясы Қызылорда облыстық филиалының «Ауыл жастары» жастар қанаты мен «Арал-АС» шығармашылық тобы ұйымдастырды.
Көңілді тапқырлар додасына ауданның белсенді жастары қатысып, өз өнерлері мен тапқырлықтарын ортаға салды. Финалдық кезең барысында командалар қоғамдағы өзекті мәселелерді әзіл арқылы көтеріп, «Заң мен тәртіп», «Адал азамат» тақырыптары аясында мазмұнды қойылымдар көрсетті. Сонымен қатар, жастар ел бірлігі, қоғамдық жауапкершілік және адалдық құндылықтарын насихаттады.
Шара аясында ауданның белсенді жастары мен команда жетекшілері «Ауыл» партиясының төрағасы, Парламенті Мәжілісінің депутаты Серік Егізбаев және «Ауыл» партиясы Қызылорда облыстық филиалының төрағасы, облыстық мәслихат депутаты Садық Мұстафаның атынан арнайы алғыс хаттармен марапатталды.
Сонымен қатар, қатысушылар мен жеңімпаздарға алғыс хаттар, дипломдар және кубоктар тапсырылып, үздік құрамалар алдағы облыстық жайдарман чемпионатына жолдама алды.
Аталған шара жастардың шығармашылық қабілетін шыңдап, олардың қоғамдық белсенділігін арттыруға бағытталған маңызды алаңға айналды.
