USD
УАШИНГТОН. 14 сәуір. АҚШ пен Иран келіссөздердің қайта басталуы мен ұзақ мерзімді бітімгершілікті талқылайды. Бұл туралы The Moscow Times ақпарына сүйенген rast.kz хабарлайды.
Уашингтон мен Тегеран Исламабадтағы сенбі күнгі кездесуден кейін ұзақ мерзімді атысты тоқтатуға қол жеткізу үшін тікелей келіссөздердің жаңа раунды жөніндегі консультацияларды жалғастыруда. Мұның жайын Bloomberg ақпараттандырылған мәнбелерге сілтеме жасай отырып жазады.
Тараптар 21 сәуірде болатын екі апталық бітім аяқталғанға дейін бірқатар негізгі мәселелер бойынша жаңа талқылаулар өткізгісі келеді. Негізгі мәселелердің бірі ирандық мамандардың уранды байытуды тоқтата тұруы болуы кәдік, оның мерзімі туралы тараптар әлі бір келісімге келе алмады.
Сұхбаттасушылардың айтуынша, АҚШ пен Иран делегациялары Пәкістан астанасында тағы кездесуі тиіс, бірақ басқа да ықтимал орындар қарастылып жатыр. Ақпаратты CNN дереккөздері де растайды. Олардың айтуынша, президент Дональд Трамптың талаптарын қанағаттандыруға Тегеран ықтиярлы болса, Ақ үй жақын арада тікелей келіссөздерді қайта бастауға дайын. Ақ үйдің өкілдері қақтығысты дипломатиялық жолмен шешуге үміттенеді, дейді мәнбелер.
«Егер жағдай осы бағытта жүрсе, біз кездесуді тез ұйымдастыруға дайын болуымыз керек», – деді америкалық шенеунік CNN-ге.
Телеарна сұхбаттасушылары алдағы күндері консультациялардың қарқынына байланысты АҚШ пен Иран бітімгершілік мерзімін ұзарта алатынын растады, осылайша олар мәміле жасауға көбірек уақыт алады.
11 сәуірде Исламабадта вице-президент Джей Ди Вэнс бастаған америкалық келіссөз жүргізушілер Иранға уранды байытуды 20 жылға тоқтата тұруға келісуді ұсынды, деді келіссөздердің барысымен таныс дереккөздердің бірі. Тегеран бұған жауап ретінде бес жылға тоқтата тұруға құмбыл екенін мәлімдеді. Бірақ АҚШ тарапы бұған келіспейтін сыңай танытты.
Иранның АҚШ шарттарын дереу орындаудан бас тартқаннан кейін, Трамп Ормуз бұғазында Иран порттарын қоршауға алуды бұйырды және оны бұзуға тырысатын кемелерді басып аламын деп қорқытты. АҚШ-тың 15-тен астам кемені тартқан шектеулері дүйсенбіде күшіне енді.
