USD
УАШИНГТОН. 25 маусым. АҚШ қарулы күштерінің Еуропадағы құраманың басшысы лауазымына үміткер Украина Ресеймен соғыста жеңе алады деп есептейді. Бұл туралы DW ақпарына сүйенген rast.kz хабарлайды.
Сенатта Гринкевичтің кандидатурасын бекіту жөнінде тыңдаулар өтті.
АҚШ президенті Дональд Трамп елдің Еуропадағы командованиесі (EUCOM) басшысы лауазымына ұсынған генерал-лейтенант Алексус Гринкевич Украинаның үш жылдан астам уақыттан бері Ресейдің басқыншылығымен жүріп жатқан соғыста жеңіске жететініне сенім білдірді.
Гринкевич 24 маусым, сейсенбі күні Сенатта өз кандидатурасы қарап жатқан тыңдауда сөз сөйледі.
«Мен Украина жеңеді деп ойлаймын. Отаныңызға қауіп төнген сайын сіздер біздің елестетуіміздің өзі қиынға түсетін табандылықпен күресесіздер деп ойлаймын», – деп келтіреді Reuters агенттігі Гринкевичтің сөзін.
«Генерал-лейтенанттың кандидатурасын бұдан бұрын НАТО-ға мүше мемлекеттер комитеті мақұлдаған», деп хабарлаған еді Солтүстік альянстың баспасөз қызметі 5 маусымда. Осы күні Трамп түйінді әскери лауазымға Гринкевичтің кандидатурасын ұсынған. EUCOM басшысы дәстүрлі түрде Еуропадағы одақтастардың жоғарғы қолбасшысы (SACEUR) қызметін атқарады.
Гринкевич қазіргі қолбасшы, генерал Кристофер Каволиді ауыстырады. Биліктің ресми ауысуы жазда болады деп күтілуде.
НАТО-ның Еуропадағы бірлескен күштерінің жаңа басшысы айтарлықтай әскери тәжірибеге ие. Ол АҚШ-тың Біріккен штаб бастықтары басқармасының операциялық директоры қызметін атқарды және оған дейін Біріккен әуе күштерінің басшысы болды. Бұдан бөлек, F-16 Fighting Falcon және F-22 Raptor жойғыштарында ұшу нұсқаушысы, қару-жарақ офицері және сынақ ұшқышы қызметін атқарды.
SACEUR позициясы одақ құрылымында Бас хатшыдан кейінгі екінші маңызды болып саналады. Бұл лауазымның иесі әскери операцияларды жүргізуге және миссияны жоспарлауға жауапты. Ол саяси деңгейде бекітілген тапсырмаларды орындау үшін альянсқа мүше мемлекеттерден қажетті күштерді сұрауға құқылы.
