USD
АЛМАТЫ. 24 маусым. Алматыдағы әл-Фараби даңғылының бойында жан түршігерлік жол апатын жасап, үш адамның өмірін жалмаған Александр Пак 10 жылға сот жүзінде жаза алды. Бұл туралы Dalanews.kz ақпарына сүйенген rast.kz хабарлайды.
Қайғылы жол апаты 2026 жылдың 21 наурызына қараған түні әл-Фараби даңғылында орын алған. Жол-көлік оқиғасы салдарынан қарсы бағыттағы Mercedes көлігінің жүргізушісі мен екі жолаушысы оқиға орнында көз жұмған. Олар 1996 жылы туған Еламан Қайыржанұлы деген жүргізуші, 2003 жылы туған Құмар Теңелбаева және 2005 жылы туған Томирис Қыдырбек деген жас қыздар болып шықты.
Мемлекеттік айыптаушы Әлібек Күмісбеков сот процесіндегі жарыссөзде сотталушыны 10 жылға бас бостандығынан айыруды сұрады.
22 маусым күні Алматының қылмыстық істер жөніндегі мамандандырылған ауданаралық соты істі ақырына дейін жеткізіп, 33 жастағы Александр Пакке қатысты үкім шығарды.
Судья Еркін Майшынов айыпталушыны Қылмыстық кодекстің 345-1-бабының 4-тармағы («абайсызда екі немесе одан көп адамның өліміне алып келген іс-әрекет») бойынша кінәлі деп таныды.
Сот осыған орай Александр Пакке ең төменгі қауіпсіздік деңгейіндегі қылмыстық-атқару жүйесі мекемесінде 10 жылға бас бостандығынан айыру жазасын кесті. Бұдан бөлек, оны өмір бойына көлік жүргізу құқынан айырды.
Сот сондай-ақ қаза тапқан 20 жастағы қыз әкесінің моральдық шығын өндіру жөніндегі талабын ішінара қанағаттандырды. Сот шешімімен Рүстембек Шотеновқа моральдық өтемақы ретінде 10 миллион теңге төленетін болды. Жәбірленуші тарап алдында 100 миллион теңге өтемақы сұраған еді.
Бір қадап тұрып айта кететін жағдай: жол апатында қаза тапқан үш жас азаматтың екеуінің жоқтаушылары – жәбірленуші тарап осындай айдың-күннің аманында даңғыл бойында құйғытып жарысып жүріп, алапат апат жасаған айыпталушыға өздерінің кешірім бергендерін жариялап қойған екен. Іштерінде бір азамат қана өзінің арызын қайтып алмайтынын баяндады. Сотталушы болса, қаза тапқандардан кешірім сұрап, олардың жоқтаушыларына өтемақы беруге дайын екенін мәлімдеген.
Дегенмен, Фемида тарапы олардың кешірген-кешірмегендерін еш қаперге алған жоқ.
Сот үкімі әлі заңды күшіне енген жоқ.
