Түрікменстанда Бердымұхамедовке ас беруге ақша жиналып жатыр
АШХАБАД. 23 сәуір. Түрікменстанда президенттің әкесі Мяликгулы Бердымухамедовтің қайтыс болуына байланысты бюджет қызметкерлерінен ақша жиналып жатыр. Бұл туралы «Азатлық» радиостанциясының түрікмен редакциясы хабарлады.
«Марый және Лебап веляаттарында президент Гурбангулы Бердымухамедовтің әкесі Мяликгулы Бердымухамедовтің қайтыс болуына байланысты ас беру жоспарланыпты. Ал садақаға кететін шығын бюджет қызметкерлерінің есебінен жабылады», – делінген хабарламада.
Марый велаятында бір полиция қызметкері радиостанция тілшісіне ақша жинаудың 21 сәуірден басталып кеткенін айтты. Аталмыш облыстардағы бюджет қызметкерлерінің бәрінің айлық жалақыларынан белгілі бір сомада қаржы ұсталып қалып жатқаны белгілі болды. Мысалы, жалақылары төмен коммуналдық қызмет пен водоканал қызметкерлерінің әрбірінен 20 манаттан ұсталуда, жалақылары орта деңгейден жоғары мекемелер қызметкерлері 50 манаттарынан қағылады, ал полиция қызметкерлері 100 манат ақшасын беріп кетеді.
Тілшінің анықтауынша, жергілікті кәсіпкерлерге садақаларды қажетті азық-түлікпен қамтамасыз ету тапсырылыпты, ал малшылар малдарын алып жетуге тиіс.
Қазасына бүкіл ел дүрлігіп жатқан Мяликгулы Бердымухамедов ұзаққа созылған ауыр науқастан кейін 18 сәуір күні қайтыс болған еді.
Осы уақытқа дейін Түрікменстан президенті ата-анасының образдары Гурбангулы Бердымухамедовке табынудың басты құралдарының бірі болып келді.
2017 жылы Мяликгулы Бердымухамедовтің есімімен «Mälikguly Berdimuhamedow» деген медаль шығарылды, сол жылы президент әкесі мен оның ішкі істер министрлігіндегі қызметіне арналған «Mertler Watany beýgeldýär» («Мәрттер Отанын асқақтатады») деген кітабының тұсакесерін жасады, бұдан кейін ішкі істердің №1001 әскери бөлімі мемлекет басшысы әкесінің атымен аталды.
