Қытайда бір мұғалім сабақ білмеген қызды ұрып өлтірді
БЕЙЖІҢ. 19 қыркүйек. Қытайда өзінің қойған сұрақтарына екі рет дұрыс жауап бере алмай қалған он жасар оқушы қызды бір мұғалім өлгенше ұрды. Бұл туралы Daily Star газеті хабарлады.
Қытай мектептерінде оқушыларды ұрып-соғу кеңге етек жайған. Бір провинцияда тіпті оны заңдастыру жайында да мәселе көтеріліп жатыр екен.
Мақалада мұғалімнің өзін соншалықты қатал ұстағаны атап көрсетіледі. Ол он жасар оқушы қызды сыныптастарының көзінше басынан қатты ұрып, тізерлетіп отырғызып қойған. Азаптау толық аяқталғаннан кейін кішкентай қыз өзін жайсыз сезіне бастаған. Ол сосын шұғыл ауруханаға жеткізіледі, бірақ дәрігерлер оқушының өміріне араша түсе алмай қалады.
Қазір мектепте тексеру жұмыстары жүріп жатыр. Мектеп директоры мен күдікті мұғалім атқарып отырған міндеттерінен шеттетілген.
