АҚШ ғалымдары Навальныйды Нобель сыйлығына ұсынды

ВАШИНГТОН. 17 қыркүйек. АҚШ-тың бір топ ғалысдары ресейлік блогер Алексей Навальныйды Нобель сыйлығына ұсынды. Бұл туралы Gazeta.ru хабарлады.

Ресейлік саясаткердің аталмыш сыйлыққа ұсынылып жатқанын АҚШ-тағы Ратгерс университетінің профессоры, социолог Сергей Ерофеев өзінің Facebook-тегі парақшасына жазды. Ол бұл кандидатураны Америкадағы танымал университеттердің ғалымдары таңдап алғанын анықтай кетті.

Ерофеев сондай-ақ таяу арада Навальныйдың кандидатурасын мемлекет қайраткерлері мен халықаралық ұйымдардың өкілдері де қолдайды дегенді айтады.

Профессордың пікірінше, блогер бүкіл әлемде бірқатар идеалдар үшін күреске елеулі үлес қосып келеді.

Бұдан бұрын норвег депутаты, Прогрес партиясының мүшесі Критиан Тюбринг-Йедде АҚШ президенті Дональд Трампты Израиль мен БАӘ арасындағы қарым-қатынасты қалпына келтіргені үшін 2021 жылғы Нобель сыйлығына ұсынған болатын.