Жаңалықтар жаңғырығыЖаһан

ЕО кеңесі ертең Беларусьтегі жағдайды талқылайды

БРЮССЕЛЬ. 13 тамыз. Еуроодақ кеңесінің шұғыл түрде ертеңге шақырылған отырысы Беларусьте соңғы күндері орын алған жағдайды талқылайды. Бұл туралы Naviny.by хабарлады.

«Еуроодақ елдерінің сыртқы істер министрліктері басшылары Беларусьтегі жағдайды талқылау үшін 14 тамызда кезектен тыс кездесуге жиналады», – делінген хабарламада.

«Жұма күні мен сыртқы істер жөніндегі кеңестің кезектен тыс отырысын шақырамын, – деп жазды ЕО-ның сыртқы саясат және саясат қауіпсіздігі жөніндегі жоғарғы өкілі Жозеп Боррель твиттер-аккаунтында. – Біз онда Шығыс Жерорта теңізіндегі өзекті мәселелер мен ахуалды, Беларусьтегі президент сайлауын, сондай-ақ Ливандағы оқиғаларды талқылаймыз».

Осының алдында Боррель Беларусьте өткен президент сайлауының әділ де, еркін де болмағанын, ал Еуроодақтың адамдарға зорлық-зомбылық көрсету мен қамауға алуға жауапты тұлғаларға қарсы санкция енгізу мүмкіндігін зерттейтінін мәлімдеген еді.

«Сайлау науқаны барысында Беларусь халқы өзінің демократиялық өзгерістерге ұмтылатынын танытты. Алайда, президент сайлауы еркін де, әділ де болған жоқ», – деп атап көрсетті ол мәлімдемеде.

Беларусь Орталық сайлау к,омиссиясының мәліметі бойынша, іс басындағы президент Александр Лукашенко 80,08 пайыз дауыс алса, оның басты қарсыласы Светлана Тихановская 10,9 пайыз дауысқа ие болған. Бірақ оппозиция жағы өз есептері бойынша Тихановскаяның керісінше кемінде 80 пайыз дауыс жинағанын айтып отыр.

Осыдан кейін сайлау өткен 9 тамыз күні түнде елде қарсылық қозғалысы басталып кетті. Ол 10, 11, 12 тамыз күндері түнде тағы жалғасты. Мұның бәрі қарсылық қозғалысына шыққандардың күштік құрылымдардың қысымына ұшырауымен өтті. Шерулердің бейбіт жағдайда өтіп жатқанына қарамастан, ОМОН демонстранттарға оқ атты, соққыға шықты, су шашты, 6 мыңнан астам адамды қамауға алды. Ал ұсталғандарға көрсетіліп жатқан қорлық жөнінде талай жазылып жатыр.

Осы күндері өз басы мен балаларының қауіпсіздігі үшін Светлана Тихановская Литваға кетіп қалуға мәжбүр болды. Оны солай етуге үгіттеген де билік өкілдері еді.

Тағы көрсету

Пікір қалдыру

Э-пошта мекенжайыңыз жарияланбайды. Міндетті өрістер * таңбаланған

Ұқсас мақалалар

Back to top button