USD
ЛОЗАННА. 24 тамыз. Халықаралық Шахмат федерациясының (ФИДЕ) президенттік кеңесі Ресей спортшыларының 2026 жылғы Дүниежүзілік шахмат Олимпиадасына қатысуларына жол бермейді. Бұл туралы Deutsche Welle (DW) ақпарына сүйенген rast.kz хабарлайды.
ФИДЕ-нің шешімі жайлы «РБК Спорт» басылымына Ресей шахмат федерациясының (РШФ) вице-президенті Сергей Смагин айтып берді.
РШФ атқарушы директоры Александр Ткачев ТАСС агенттігіне берген сұхбатында шешім ФИДЕ президентінің міндетін атқарушы Вишванатан Анандтың өтінішінен қабылданғанын жеткізді. Анандты кеңес өкілдерінің көпшілігі қолдады.
Украина шахмат федерациясының (УШФ) вице-президенті Владимир Ковальчук «ФИДЕ-нің бұрынғы президенті Аркадий Дворковичтің ессіз қысымына қарамастан», Ресейден келген шахматшылардың 46-шы Дүниежүзілік олимпиадаға қатыспауын құптады. «Украина шахмат федерациясының кезекті жеңісі!», – деп жазды Ковальчук Facebook әлеуметтік желісінде.
УШФ Ресей командаларының Олимпиадаға қатысуы туралы дауыс беру қарсаңында бұған жол бермеуді талап етіп, ФИДЕ-ге ресми хат жолдады.
Ресей үкіметінің бұрынғы вице-премьері Дворкович шілде айында ЕО санкциялар тізіміне енгізілгеннен кейін ФИДЕ басшысының өкілеттігін өз еркімен тоқтатты. 23 тамызда ұйым кеңесінің отырысына дейін ол ТАСС-қа ұйым кеңесінің шешімдерін қабылдауға қатыспайтынын айтты.
Дүниежүзілік шахмат олимпиадасы Өзбекстанның Самарқанд қаласында алдағы 16-27 қыркүйек аралығында өтеді.
Ресей командалары Ресейдің басқыншылар армиясы Украинаға басып кіруі басталғаннан кейін 2022 жылдан бастап барлық турнирлерден шығарылып тасталған болатын.
