USD
ҚЫЗЫЛОРДА. 18 тамыз. Қызылордада QZO CUP «Заң мен тәртіп – жастар таңдауы» атты республикалық екі күндік пікірсайыс турнирі өз мәресіне жетті. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Турнир «Заң мен тәртіп» қағидатын жастар арасында кеңінен насихаттауға, құқықтық мәдениетті қалыптастыру мен жас ұрпақтың азаматтық белсенділігін арттыруға арналды.
Екі күнге созылған интеллектуалдық додаға еліміздің әр өңірінен келген үздік дебатшылар қатысып, өзара бақ сынады. Турнир барысында қатысушылар білімін, логикалық және сыни ойлау қабілетін, шешендік өнерін, өз ұстанымын дәлелді түрде қорғау және қарсы пікірге сауатты жауап беру дағдыларын көрсетті.
«Заң мен тәртіп» қағидаты – қоғамдағы тұрақтылық пен қауіпсіздікті қамтамасыз етудің маңызды негіздерінің бірі. Осы құндылықтарды жастар арасында дәріптеу бағытында пікірсайыс алаңының маңызы зор. Себебі дебат барысында жастар өз ойын еркін жеткізіп қана қоймай, заңдылықты құрметтеу, азаматтық жауапкершілік және қоғам алдындағы міндеттер туралы пікір алмасуға мүмкіндік алды.
Турнирдің басты ерекшеліктерінің бірі еліміздің әр өңірінен келген жас дебатшылардың бір алаңда бас қосып, тәжірибе алмасуы болды. Әр өңірдің өзіндік дебат мәдениеті, тәжірибесі мен жаңа идеялары ортақ пікірталас алаңында тоғысты.
Жарыс қорытындысы бойынша 1-орынды Тараз қаласы мен Алматы қаласының «Тараз махаббатым» командасы иеленді. 2-орын Түркістан облысының «Бекзат Саттарханов» командасына бұйырса, 3-орынды Алматы облысының «И, Ақұдай» және Қызылорда облысының «Ұйқыбастар» командалары өзара бөлісті.
Жеке номинациялар бойынша «Ең үздік спикер» аталымына Алматы қаласының өкілі Темірлан Есенов лайық деп танылды. «Үздік спикер» номинациясы Шымкент қаласының өкілі Нұрмұхамед Қалқабайға берілді. «Үздік төреші» аталымын Думан Набат иеленсе, «Үздік делегация» аталымы Түркістан облысының еншісіне тиді. Ал «Көрермен көзайымы» номинациясымен Бақдәулет Сейсенбай, Мейрамбек Теңес және Диас Дастанұлы марапатталды.
Республикалық турнир жоғары деңгейде ұйымдастырылып, қатысушылардың пікірталас мәдениетін жетілдіруге, сыни ойлау қабілетін дамытуға және өз көзқарасын нақты дәлелдермен қорғауына мүмкіндік берді.
QZO CUP – жастардың білімін шыңдап, азаматтық ұстанымын қалыптастыратын және «Заң мен тәртіп» қағидатын насихаттайтын маңызды пікірталас алаңына айналды.
